Nunanut allanut unammisartunut sungiusaasoq: Semifinalimut anngunnissaat naatsorsuutigaara
Asammik arsartartut arnat nunarsuaq tamakkerlugu ukiaru pissartanngorniutissapput. Tamanna Japanimi pissaaq.
Tamannali pitinnagu pissartanngorniunissamut anngunniunnerit aqqusaaqqaagassaapput.
Kalaallillu arnat assammik arsanermi nunarput sinnerlugu unammisartut 16-it Mexicomi annguniunnissanut piareeqqasut, sungiusaasuat isumaqarpoq.
- Pimoorussillutik ulluinnarni peqqissumik inuuneqartut amerlatikkiartorput. Aamma malunnarpoq banep iluani arsartut amerlanerit nalunarsigaluttuinnartut kikkut toqqassanerlugit sungiusaasutut. Taamaatsillugillu iligiit pitsanngoraluttuinnarneri malunnarpoq taamaattumik neriulluarpunga angusaqarluassalluta, Arnat assammik arsarlutik nunanut allanut unammisartuisa sungiusaasuat, Johannes Groth taama oqarpoq.
Kalaallit unammiarnissaminut atatillugu ilaatigut Danmarkimi Ikast Idrætsefterskolemi atuartut assammik arsartartut sungiusaammik unammigaat sungiusaasoq oqaluttuarpoq.
AAMMA ATUARUK Kalaallit assammik arsartartut nunanut allanut unammisartut arnartaat VM-imut piareersarialersut
Arnat unammiartussat GSS-imeersuullutillu B-67-imeersuummata peqatigiiffimminni sungiusartarput, tamatumalu saniatigut nunanut allanut unamisartut sungiusaasuannit sapaatip akunneranut ataaseriarlutik sungiusartarlutik.
Assammik arsartartut kattuffimminnit ukiuni tallimani anguniagassinneqarsimasut sungiusaasuat oqarpoq.
- Imaappoq ukiut tallimat iluanni VM-i angorusullutigu. Ukioq manna ukioq siullerpaajuvoq tassani anguniakkatsinni, semifinalit angorusuppagut, Johannes Groth KNR-imut taama oqarpoq.
Arnat assammik arsarluni nunanut allanut unammisartut nunatsineersut 16-it sungiusaasunik marlunnik, timimik sungiusaasumik aqutsisumillu ilaqarlutik Danmarkimiit maajip 24-ani Mixicomut aallassapput. Unamminerillu juunip aappaani naammassineqassapput.
