Schweizemiup pisoorsuup meeqqanut atuakkiap kalaallisuunngortinneqarnera aningaasaliiffigigaa

Taassuma pisoorsuup, Jean-Marc Probstip ’Den lille prins’-imik saqqummersitat oqaatsinik assigiinngitsut 4.390-it pigai. 

Saqqummersitat oqaatsini 331-ni agguataaqqapput. Kalaallisulli nutserneqarnikuunngilaq.

Tamannali allanngussaaq, tassami Den Lille Prinsip kalaallisuunngortinneqarnera , tassa ’Ataqqinartuaraq’ Milik Publishingip aggustip qulingani saqqummersissavaa.

Aviisi Politikken taama allaaserisaqarpoq.

Atuagaq Mira Kleistimit Jean-Marc Probstitulli Antoine de Saint-Exupép atuakkiaanik tusaamaneqarluartumik nuannarisalimmik aappaqartumit kalaallisuunngortinneqarpoq.

Taassuma inooqataata atuagaq pingaatitani kalaallit meerartaannit atuarneqarsinnaanngortikkusuppaa.

- Atuakkap aqqata nutserniarnerinnaa ajornakusoorsimavoq, Mira Kleist Politikkenimut oqarpoq.

’Prins’ kalaallisut taaguuteqanngilaq. Danmarkimit kunngip erneri tikeraaraangata danskit oqaasiat atorneqakkajuppoq, atuakkamili danskisut allassimasoqartikkusunnginnamiuk kalaallisut allassimatikkusullugu. Taamaalilluni atuagaq Ataqqinartuaqqamik atserpaa.

Atuakkap saqqummersinnissaanut aningaasaliisussarsiortoqalermat, schweizimioq pisoorsuaq ’Den lille prins’-ip nunarsuarmi sumiiffinni assigiinngitsuni nalunnginneqarlualernissaanik siunertaqarluni aningaasaateqarfiutilik, aningaasaliiumavoq.

- Taassuma tapersiineratigut atuagaq nunatsinni atuarfinni ilinniutitut atorneqartussanngorlugu pigineqalissaaq, atuakkanik naqiterisitsisarfimmi Milik-mik aaqqissuisoq piginnittorlu, Lene Therkildsen oqarpoq.
Kalaallit meerartai inersimasullu qanorluunniit oqaasissaqaraluarpata Mira Kleistip anguniakkani angoreernerpaa.

- Aqqalussannut kalaallisuunerusoq atuartartumut ataatsimik tunniussereerpunga, Politikkenimut oqarpoq.