Savalimmiut takornariartitsinermut pisortaat Danmarkimut: Uaguttaaq nunarsuarmioqataagaluarpugut

Takornariat norskit, islandimiut norskillu juunip ulluisa 15-ianni Danmarkiliarsinnaanngussapput. 

Danskit ministeriunerat, Mette Frederiksen, tusagassiortunik tallimanngornermi katersortitsinermi taama oqarpoq. 

Kisianni Savalimmiut eqqaaneqanngillat. Taamaammat Visit Faroe Islandsip savalimmiormiut inuillu allat Savalimmiuni nuannisarlutik siornatigut feeriarsimasut Savalimmiut nunarsuarmioqatinit maluginiarneqarnissaanut nittarsaasseqataanissaannik kaammattorpai.

AAMMA ATUARUK Tyskit, islandimiut norskillu Danmarkiliarsinnaanngortut

Savalimmiuni nutaarsiassaqartitsiviit ilaat Socialurin taama allappoq.

- Mette Frederiksen tusagassiortunik sapaatit akunnerisa siulianni katersortitsimmat pissangaqaluta malinnaavugut, Savalimmiullu nunat danskinit juunip ulluisa 15-iata kingorna tikinneqarsinnaasut ilaattut taanngikkaa maluginiapallapparput, Visit Faroe Islandsip pisortaa Guðrið Højgaard oqarpoq.

- Danmarkimi nutaarsiassaqartitsiviit arlallit Savalimmiut tusagassiornerminni eqqaanissaat aamma puiortarpaat. Taamaammat Savalimmiut nunarsuarmioqataanerat danskinut danskillu Savalimmiunut aasaru tikilluaqqusaanerat eqqaasitsissutigilaarusupparput. 

Takornariat danskit, kalaallit islandimiullu juunip ulluisa 15-ianni Savalimmiunukarsinnaanngussapput – Visit Faroe Islandsilu naapertorlugu taakku Savalimmiunut tikikkunik angerlarsimaannaqqusaanavianngillat.