Nutaarsiassaqartitsivik: Savalimmiut Ruslandimit niueqatigiumaneerukkunik annaasaqaatigingaatsiarsinnaavaat
Savalimmiut Ruslandimut tunisatigut annaasaqarfigingaatsiarataannaavaat.
Nunartimmi Savalimmiut aalisakkanik tunisassiaannik eqqussuiviujunnaassasoq, Ruslandip aalisarnermut aqutsisoqarfiata innersuussutigaa.
Nutaarsiassaqartitsivik DR taama allappoq.
Ingammik aalisakkat immami ikerinnaasiortut soorlu ammassassuit avaleraasartuullu matumani pineqarput – Savalimmiullu aalisakkanik taakkuninnga Ruslandimut ukiuni kingullerni qulini tunisaqarluartarput.
Savalimmiummi aalisakkanik taakkuninnga avammut tunisaasa affaannit ikinnerunngitsut Ruslandip ukiup ataasiunngitsup ingerlanerani pisiortorpai. Taamaammallu Savalimmiut Ruslandimit niueqatigiumaneerukkunik avammut tunisatigut annaasaqangaatsiassapput.
- Aningaasanik annaasaqaatigingaatsiarsinnaammassuk qanoq iliuuseqarfigisariaqarlugulu naleqqussartariaqarsinnaapput, aningaasarsiornermik ilisimasalik Savalimmiullu aningaasaqarnermut siunnersuisoqatigiivineersoq Johnny Í Grótinum DR-imut oqarpoq.
Soorliuna Rusland Savalimmiut aalisakkanik tunisassiaannik eqqussuiviujunnaarnissamik pilersaartoq?
Tamanna Savalimmiut naalakkersuisuisa EU-tulli Ruslandip Ukrainemik saassussineranik assuarliillutik Ruslandimik niuernikkut killilersuinerannik peqquteqartoq, DR allappoq. Aamma Savalimmiut russit umiarsuaasa umiarsualivimminnik atuisinnaanerannik juulimi killilersuipput.
