Assi: Simon Uldum

Qinersisartunik isumasiuineq: Savalimmiunit saamerliit talerperliillu tamarmik qinigaatitaqassasut

Savalimmiuni partiip talerperliusup Sambandspartiip qinersinermi ajugaanissaa qinersisartunik isumasiuinermi nutaami takutinneqarpoq.

Savalimmiuni partiit anginerit marluk naalagaaffeqatigiit ataannarnissaannik anguniagaqartut Gallupip qinersisartunik isumasiuinera nutaaq naapertorlugu tamarmik Folketingimut qinigaatitaqassapput.

Partiip talerperliusup Naalagaaffeqatigiinnik ineriartortitseqqinnissamik annertusaanissamillu qineqqusaaruteqartup qinersisartut 29 procentiinit taaguunneqarluni partiini anginersanngornissaa qinersisartunik isumasiuinermi ersersinneqarpoq.

Savalimmiuni Socialdemokraatit Savalimmiut, nunatta Danmarkillu naalagaaffeqatigiinnerisa ataaannarnissaanik aamma anguniagaqartuusut qinigaaqqittussatut aamma ilimagineqarput. Partii qinersisartut 24 procentii sinnilaarlugit taaguunneqassangatinneqarpoq.

Gallupillu isumasiuinera eqquutissappat, Savalimmiunit qinigaasut Folketingimi talerperlernik saamerlernillu tapersersuissapput.

Savalimmiuni Radio TV-lu nutaarsiassaqartitsivillu Vágaportalen misissuisitsisuupput.

Isumasiuinerullu taama takutitsinera avissaarniaqatigiit partiiannut Tjoðveldimut tusarluarnanngilaq, taannami qinigaaffimmi qaangiuttumi Folketingimi ilaasortaatitaqartut aapparaat.

Avissaarniaqatigiit partiiat isumasiuineq naapertussagaanni 21,6 procentinit taaguunneqarluni 2,9 procentpointinik kinguariassaaq.

Magni Arnep, avissaarniaqatigiit partiiat sinnerlugu Folketingimi qinigaaffimmi qaangiuttumi ilaasortaasup, partiinit mikinernit aamma namminiilivinnissamik anguniagaqartunit unammillerneqarnertik kinguariarnerminnut pissutaasoraa.

Taakku ilagaat Selvstyreparti, (Namminiilivinniaqatigiit partiiat, aaqq.) 2,6 procentinit taaguunneqarnissaanik ilimagineqartoq. Partiip tupaallaatigineqartumik nalunaarutigisimavaa Folketingimut qinigaatitaqassaguni inissaq taanna inuttalerniarnagu.

- Aamma partiitsinni qinersisartut akornanni Folketingimut qinersinissaq soqutigineqarpallaanngilaq. Isumasiuinerullu kinguariarnissatsinnik takutitsineranut tamanna pissutaasinnaavoq, Magni Arge Ritzauimut taama oqarpoq.

Folketingimut qinersinissaq Savalimmiuni nalinginnaasumik soqutigineqarpallaarneq-ajorput. Folketingimut kingullermik qinersisoqarmat qinersisinnaatitaasut 65,6 procentii qinersipput.

Savalimmiuni inatsisartunut Lagtingimut qinersisoqaraangat qinersiartortut amerlanerungaatsiartarput. 2015-imimi septembarimi qinersisoqarmat qinersisinnaatitaasut 88,8 procentii qinersiartorput.

Savalimmiuni naalakkersuisut siulittaasuata Aksel V. Johannesenip Socialdemokraatineersup, Lagtingimut aggustip 31-ani qinersisoqarnissaa nalunaarutigaa. Naalakkersuisooqatigiit siuttuuffigisai ukiuni sisamani atapput.

Gallupip qinersisartunik isumasiuinera juunip 18-anit 21-anut pivoq. Inuillu 543-t peqataapput nalorninaateqassusialu 3,4 procentiuvoq.

/ritzau/

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat