Savalimmiuni suliumajunnaarnermi sapaatit akunnerisa pingajuanni meeqqeriviit matusut
![](/sites/default/files/styles/image_934x467/public/2024-05/20210913-123809-2-1920x1280we.jpg?h=96316014&itok=samGsEzY)
Savalimmiuni eqqaavilerisut, lastbiilinik ingerlatsisut, quersuarni sulisut, eqqiaasut allallu sulisut sapaatit akunnerisa pingajussaanni suliumajunnaaqqapput.
Suliumajunnaartoqarnera sunniuteqaleriartorpoq.
Meeqqeriviit matupput, inuillu benzinamik amigaateqarnertik pissutigalugu angerlarsimaannartariaqarput.
Savalimmiuni tusagassiorfimmi Kringvarpimi aaqqissuisoq, John Johannesen TV 2-mut paasissutissiivoq.
- Meeqqeriviit amerlanersaat eqqiaasussaqannginneq eqqagassalerisussaqannginneralu pissutigalugit matoqqapput. Atuarfiit aamma eqqungaanissaat naatsorsuutigineqartoq taanna tusagassiorfimmut oqarpoq.
Maajip 15-ianili suliumajunnaartoqartoq
Savalimmiormiut Rigsombudsmandiata Folketingimut maajip 15-iani ilisimatitsinera naapertorlugu akissarsiat pillugit nutaamik isumaqatigiinniarnerit ajalusoornerat pissutigalugu sulisartut peqatigiiffiini ilaasortat arlallit maajip 14-iani marlunngornerup unnuaanit suliumajunnaarput.
Isumaqatigiissut atuuttoq 2024-mi maajip aallaqqaataani atuukkunaarpoq.
Suliffeqarnermi illuatungeriit nutaamik isumaqatigiissuteqarnissaq apriilip sisamaanili iluatsinngitsumik isumaqatigiinniutigaat.
Sulisitsisut 9 procentimik akissarsianut qaffaanissamut akuerigaat John Johannesenip TV 2-mut oqaatigaa.
Tamannali sulisut peqatigiiffiisa 13-imit 15 procentimut qaffaasoqarnissaanik piumasaqartut itigartitsissutigaat. Taassuma pissutsit aalajangersimasuunerarpai.
Pisiniarfimmi ilioqqaaviit imaqanngitsut
Savalimmiuni sulisartut 5000-it missaanniittut suliumajunnaartoqarnerani ilaapput. Taakkulu innuttaasut 10 procentiisa missaanniittut, Jyllands-Posten allappoq.
Orsussamik amigaateqarnerup paaqqinniffiillu matoqqanerisa saiatigut piniarfinni nioqqutissaataasiviit aamma imaqanngitsut John Johannesenip aamma paasissutissiissutigaa.
TV 2 naapertorlugu Savalimmiunut nioqqutissanik assartuineq tamarmi matoqqavoq.
Orsussamik amigaateqarneq tamat assartuissutaannut aamma sunniuteqarsimasoq Jyllands-Posten allappoq.
Qeqertani pisortat angallassinerat tamarmi uninngavoq. Taamaallaat ambulancet orsussamik toqqortaasivimmiittuuteqartut taxallu innaallagiatortut Savalimmiuni aqqusinermi kisimik angalapput.