Savalimmiuni innuttaasut politikerertaminnit inoqatiminnut akaarinninnerupput

- Innuttaasut politikeriniit siuarsimanerupput, savalimmiuni politikerit apeqqutit tamakku pillugit innimittarnerusarmata.

Taama oqarpoq radioqarfiit pingasuusut ilaanni tusagassiortoq Jon Brian Hvidtfeldt.

Aperineqartut 68 procentiisa arnaqatigiit anguteqatigiillu katissinnaanerat akueraat, borgmsterimi polimestereqarfimmiluunnit.

Innuttaasut naalakkersuisuninngaanniit eqqarsartaatsimikkut nutaaliaanerupput, Jon Brian Hvidtfeldt isumaqarpoq:

- Mannarpiaq pillugu naalakkersuinermik sulialinniit innuttaasut alloriarnernik pingasunik siuarsimanerupput.

Misissuisimanerup inernera pillugu homoseksuellit Savalimmiuni peqatigiiffianni siulittaasoq Eiler Fagraklett ima qisuariaateqarpoq:

-Misissuinerup takutippaa savalimmiormiut arnaqatiminnik anguteqatiminnillu aappaqartartut allatuulli pineqaqqungaat. Neriuppunga Lagtingip misissuinerup inernera pimoorullugu kinguneqartissangaa, katittarnermullu inatsit allanngortillugu, homoseksuellit allatulli katitinneqarsinnaanngorlugit.

Inuiaqatigiinni alaatsinaattup Jon Brian Hvidtfeldtip misissuinerup inernera malunnarluartoq pillugu qisuariaataa imaappoq:

- Ukiuni kingullerni eqqartugaq sammineqangaatsiarsimavoq. Inatsit allanngortinneqarmalli inerteqqutaavoq atoqateqartarneq pillugu inoqatinik immikkoortitsinissaq. Sakkortuumik oqallittoqartareersorlu taamanili innuttaasut killilersuerusunnginnermik isummertalerput, . Isumasiuinerup ersersereerpaa innuttaasut pingasuungaangata marluk;  arnat-arnallu aamma angutit-angutillu katissinnaanerat ajoriffissaqartinngikkaat.
 

Savalimmiuni tusagassiortoq Jon Brian Hvidtfeldt taama oqarpoq.
Inatsisartuni illuatungiliuttut saqqummiussassaanni oqaluffimmi katititsisarnissaq pineqanngilaq. Taamaallaat kommunimi.
LGBT-ip Savalimmiuni nammineq Gallup misissuinissamik suliassissimavaa.