Savalimmiuni inatsisartut naartuersittarneq taasissutigereerlugu akuersissutigigaat

Savalimmiuni inatsisartut, Lagtinget, naartuersinnermut inatsit akueraat, taamaalilluni arnat sapaatip-akunneri aqqaneq-marluk tikillugit naartusut naartuersissinnaanngorput.

Hervør Pálsdóttir partiimit Tjóðveldisflokkurinimeersoq Ritzauimut taama paasissutissiivoq.

Siunnersuut 17-init akuerineqarpoq, 16-it akerliullutik, soorlu marlunngornermi aappassaaneerneqarmat aamma taama aalajangertoqartoq. 

Hervør Pálsdóttir inatsisartunut ilaasortat sisamat naartuersinnermut inatsimmik nutaamik siunnersuuteqartut ilagaat.

Siunnersuutip akuerineqarnera nuannaarutigalugu Ritzauimut oqarpoq.

- Savalimmiuni arnat namminneq aalajangiisinnaatitaalernerat pingaaruteqarpoq oqaluttuarisaanermullu ilanngulluni.

- Pisinnaatitaaffiit makku arnarpassuarnit ukiorpassuarni sorsuutigineqartuarput, arnarpassuillu nunaminnit maanna ataqqineqarnerusutut misigisimalersimanissaat ilimagaara, taanna oqarpoq. 

Pissutsini immikkut ittuni atuunnera taamaatippoq

Savalimmiuni immikkut ittumik pisoqartillugu  aatsaat naartuersittoqarsinnaasarpoq.

Arnap inuunera peqqissusaaluunniit navianartumiittutut  nalilerneqartillugu arnarluunniit pinngitsaalineqarnikkut ilaqutarisamilluunniit naartulersinneqarsimappat ilaatigut naartuersissinnaalluni.

Siunnersuutip asserluinnangajaa siorna naligiiffiungajattumik taasissutigineqarmat itigartinneqarpoq, 15-it taamani akuersimmata 15-illu akerliullutik.

Siunnersuut Lagtingimit akuerineqassappat amerlanerussuteqartunit akuerineqaqqaartariaqarpoq.

Savalimmiuni naartuersinnermut inatsisit 1956-imiilli allanngortinneqarsimanngillat.

Peqatigiiffiup Sex & Society-p generalsekretæriata, Majbrit Berlauip, tamanna nuannaarutigaa.

- Savalimmiuni naartuerseriaannanngortoqarmat Savalimmiormiut tamaasa pilluaqquakka - Danmarkimi tamatuma atuutilerneranit ukiut 52-it qaangiutillartullu.

- Oqallisigineqarnissaa amerlasuunit piumasarineqarluni, sivisuumik ilungersunartumillu oqallisaavoq. Savalimmiuni arnat namminneq timiminnut tunngasunut maanna aalajangiisinnaanngortitaanerat qulakkeerneqarpoq, taanna oqarpoq.

Savalimmiuni arnat naartuersinniarlutik Danmarkiliartarnerat Sex og Samfund-imi siusinnerusukkut aallaserineqartarpoq.

Savalimmiuni najugallit 55.000-it inulaarpaat. 

/Ritzau/