Ukiuni 40-ni paaqqutarinninnermik suliaqartoq
Nunatsinni Inuit Innarluutillit Kattuffiata ukiumoortumik ippassaq nersornaasiinerani ateq ataasiinnaavoq tassalu: Ane B. Jensen.
Taassuma innersuunneqartut sisamat-tallimat allat peqatigalugit nersornaasiineq malinnaaffigiinnassasorigaluarpaa.
Taannali inunnik innarluutilinnik ukiuni 40-ni sulisimanini pissutigalugu nersorniarneqarami Nuummi Katersortarfimmi kisimi qitiuvoq.
- Ukioq manna nersornaat inummut immikkut illuinnaqqissaartumut tassaasorlu asasarput Ane B Jensen, Viggo Johansen Anep attorsimalluinnartup nersornaammik tunineqarnerani oqarpoq.
Naalagaaffiit Peqatigiit inunnut innarluutilinnut ullorititaani nersornaasiineq pivoq. Taanna Maniitsumi najugaqatigiiffimmi Elisibannguami forstanderitut ullormi tassani aamma ukiunik 40-nngortorsiorpoq.
Ane B. Jensen sooq toqqarneqarnera NiiK-imi suliniummut aqutsisup, Tillie Martinussenip nalunaarummi nassuiaatigaa.
- Anep forstanderiuffigisaani nammineq ilungersuutiginnissinnaanngitsunut inuuneraat. Taassuma taakku tamarmik ilungersuutigiuarpai, taanna allappoq.
Inuit aaqqissuussinerillu ukiuni 40-ni ilungersuutigigai
Anep najugaqartuutitik kiisa ukiut ingerlaneranni ilungersuutiginngilai, aaqqissuussinermili aamma pitsaanerusoqalernissaa.
Taassuma Elisibannguami sulisunut kivitsissutinik atortunillu timikkut atugassarititaasunut pitsaanerulersitsisoqarnissaa ukiuni 24-ni sulissutiginiarsaraa. Taakku siorna kiisami piviusunngortinneqarput.
Taanna qasusuilluni sulisunik attassiniartuaannartuuvoq. Tamannalu iluatsilluarluni. Elisibannguaq nunatsinni suliffinni sulisut ukiuni tulleriiaani suliffigisartagatuaasa ilagaat, Tillie Martinussen oqarpoq.
Taassuma aaqqissuussineq ukiut qulit sinnerlugit suaartaatiginiartuarpaa: Inuit innarluutillit utoqqaligaangamik susarpat? Sumiilissappat? Kimit paarineqassappat?
Ane B. Jensenip aaqqissuussineq sinaakkutillu kisimik ilungersuutiginngilai, inuillu inuunermini sullittuakkani aamma isigineqarneri.
- Toqqaannarlunga oqarusunngilanga immikkoortitaasut. Kisianni inuppassuit innarluutillit qanoq ittuuneri nalugamikkit ilaatigut tunuarsimaarfigisinnaavaat. Taamaammat uaguuvoq qaammarsaasussat innarluutillit taakkuummata aamma tunniusserujussuarsinnaasut sullillugit.
Suliffik piffissamik suliffiusumik qaangiiffiusartoq
Isumassuineq Ane B. Jensenip soraarnerani uninngisaannarpoq.
NiiK-ip nersornaasiinermini Anep najugaqartunut qanoq tunniussaqartigisinnaaneranut pisut takutitsisut arlallit nassuiaatigai.
2007-imi najugaqartut ilaat noqarujussuarnermi kingorna perululerpoq. Taanna angajoqqaaqanngilaq, oqaaseqanngilaq, Ane B. Jensenilu nammineq ilaqutaanut ukiup ingerlanerani ilaalersimalluni. Taanna noqangaatsiaraangat sulisunit sianerfigineqartuaannarnissani piumasarisimavaa. Pisorli una sakkortulluinnarmat pineqartup tamanna anigunngilaa. Ane B. Jensenip ornillugu assaatigut tigummivaa, taamaalilluni “najorneqarluni qimaguttoq”, taassuma oqaatigisimavaa.
Najugaqartoq alla juullip tungaanut aanaartoorpoq. Ane B. Jensenip najugaqartoq juulli tamakkerlugu juullimi, aamma ukiortaami kingornalu januaarip aallartilluarnissaanut saniani ilagaa. Ulloq unnuarlu, akissarsiaqarani, Anellu nammineq ilaqutaasa najunngittariaqarsimavaat. Najugaqartormi kisimiissanngilaq. Ane B. Jensenimmi najugaqarfimmiittut ilaqutariiupput, pingaartumik ilaqutaasut ungasissumi najugaqarneranni.
Siunissaq ernumassutigigaa
Nersorinninnermili aamma ernumassuteqartoqartoqarpoq. Pingaartumik inuit innarluutillit amerliartornerat.
- Elisibannguami 17-iinnarnut inissaqartitsivunga. Inissalli pisariaqartinneqartut amerlanerungaatsiarput. Inuit innarluutillit utoqqaligunik susoqassava, taanna aperivoq.
Inuit innarluutillit Danmarkimut qangaanerusoq aallartinneqartarput, nunatsinnili inissinneqartartut arlaqalerput, taakkununngali tunngatillugu susoqarnissaa ersarinngilaq.
- Illunik nutaanik sanaartortoqartariaqarpoq. Sukisaarsartarfiit angerlarsimaffitsik qimallugu ''suliartorfigisinnaasaat'' ornittagassaat, inuunerata naleqassusaanniittorujussuupput pisariaqartippaat. Sullitagut misigissutsikkut innarluuteqannginnamik, taamaallaat eqqarsartaatsimikkut kinguarsimallutik. Taamaammat atugassarititaasut pitsaasut pingaaruteqarput, Ane B. Jensen oqarpoq.
