Savalimmiormiut Spaniamiullu timmisartuisa Air Greenland ikiuleraa
Air Greenlandip timmisartorsua Norsaq Kangerlussuarmiit Københavnimut ippassaq pilersaarut malillugu nalunaaqutaq marluk miissaani aallassalluni ilaasussat 210-t issaareersut, sulisup kukkuluttorneratigut angalanissaq taamaatiinnarneqarpoq.
Timmisartorsuarmummi ikiniarluni majuartarfiit atorneqartartut biilinit kalillugit peerneqarneranni Norsap suluusaa aporneqarpoq. Suluusaq ajoqusingaatsiarlugu. Ajoquserneq annertummat timmisartorsuaq minnerpaamik sapaatit akunnerani ataatsimik atorsinnaanavianngitsoq ilisimatitsissutigineqarpoq.
Ippassaq aallartussaagaluit ullumilu Danmarkiliartussat 377-it ullumi aallassapput.
- Savalimmiormiut timmisartuutaat Atlantic airwaysit marluk ullumi attartorpagut, taakku atorlugit ilaasut 377-it Danmarkimut aallassapput, Inga Dora Guðmundsdóttir Markussen oqarpoq.
AAMMA ATUARUK Majuartarfiit Air Greenlandip timmisartuanut aportut – sivikinnerpaamik sapaatip akunnera uninngassasoq
- Kisianni ajoraluartumik ilaasussat tamakkerlugit ullumikkut inissaqanngillat. Taamaammat Spaniamiut timmisartuat Wamos Air aqagu attartussavarput ilaasullu nalinginnaasumik angallateqqissinnaalissallutik.
DMI-lli nittartagaani silassamik ilimasaarut alakkaraanni Nuummiit angalasoqarsinnaanissaa qularnarsinnaavoq.
- Kisianni takusinnaavarput Nuummi silarluttussaavoq, anorersuaq takkutilerpoq. Taamaammat angalasussat tamarmik anngutissanersut oqaatiginissaa siusippallaarpoq. Kangerlussuarmeereersulli aallarsinnaanissaat qularutiginngilarput, Inga Dora Guðmundsdóttir Markussen oqarpoq.