VIDEO Savaatillit aatsitassarsiornissaq pillugu tikinneqarlutik paasitinneqarusuttut
- Savaatillit paaserusuppaat erseqqissumik uumasuuteqarnermut qanoq sunniuteqassanersoq aatsitassarsiortoqassappat. Taamaattumik taakku tunngavigalugit savaatillit paasisaqarnerorusupput qanoq sunniuteqarnissaanik uumasuuteqarneq eqqarsaatigalugu, Savaatillit Peqatigiit Suleqatigiissut siulittaasuat, Niels Lund, taama oqarpoq.
Qaammatip ataatsip matuma siorna Naalakkersuisunngortut anguniagassatut isumaqatigiissutaanni ilaatigut ima allaqqasoqarpoq:
"Nunatsinni aatsitassat soqutigineqartut isumannaatsumillu atorluarneqarsinnaasut uranimik akoqarpata akoqanngippataluunniit, tamarmik atorluarneqassapput".
Ulorianartoqannginnersoq savaatillit qulakkeerusuppaat
- Aatsitassarsiortoqassappat, soorunami nalunngilarput oqaatigineqareersoq aatsaat inunnut uumasunullu akornutaassanngippat ingerlanneqarumaartoq, taannaavorlu tungitsinnit qulakkeerusutarput, Niels Lund oqarpoq.
Savaatillit orninneqarlutik paasititsiniaavigineqarusupput.
- Avannaaniissimasut kujataanut ingerlasimannginnerat assut uggorivarput. Savaateqarfiit eqqarsaatigalugit sukumiinerusumik tikinneqarluta oqaloqatigineqarnissarput paaserusutatsinnillu paasitinneqarnissarput kissaatigivarput, Niels Lund oqarpoq.
Naalakkersuisooqatigiinnissamik isumaqatigiissut uterfigeqqikkutsigu ilaatigut aamma ima allassimasoqarpoq:
"Naalakkersuisooqatigiilersut erseqqissaatigissavaat Kuannersuarni aatsitassanik qaqutigoortunik piiasoqalersinnaanera aatsaat akuersissutigineqarsinnaasoq aatsitassarsiornermut inatsimmi piumasaqaatit tamakkiisut naammassineqarsimappata, paasissutissallu sukumiisut qinnuteqarsinnaanermullu tamakkiisutut isigineqarsinnaasut pigineqalerpata".
Kuannersuarnili aatsitassarsiornerup pinngortitamut uumasunullu mingutsitsisinnaanera suli ernumassutigineqarpoq:
- Ajoqutaassava imaluunniit akornutaassanngila? Ilaasortat naapisimaarnerisigut aperisinnaallutillu nassuiaanneqarsinnaanerat, uagut tungitsinnit kissaatigivarput, Niels Lund naggasiivoq.
