VIDEO Savaatillik ernumasut
Aatsitassanik uranitalinnik piiaasoqarnissaa piaarpallaamik anguniarneqartoq savaatilik isumaqarpoq.
- Pilersaarutit tuaviuuppallaamik ingerlanneqarneri aallerinarput. Qulakkiigassat qulakkeertinnagit suliaq ingerlasimassaguni kingunissai nalorninartupilussuupput, Carl Frederiksen KNR-imut oqarpoq.
Pinngortitamik illersuiniaqatigiiffiup NOAH-p savaatillik ernumanerat paasilluarsinnaavaa.
- Kujataani savaatillik naatsitanik nunalerinermillu sukliaqartuupput. Uranisiortoqalissappat tamakku tamarmik sequmissapput, Falke Thue Mikaelsen, NOAH-meersoq oqarpoq.
Aatsitassanik uranitalinnik piiaasoqarnissaannik savaatillik ernumasut naalakkersuisunut allagaqartaraluartut ulloq manna tikillugu Naalakkersuisunit oqaaseqarfigiumaneqanngilaq. Tamannalu qisuariarfigineqarpoq.
- Oqaaseqarnaveersaarluni nammineq isuma kisimi aallaavigalugu naalakkersuinikkut ingerlasinnaasutut aqutsineq isumaqatiginanngeqaaq, Aqqaluaq B. Egede, Inuit Ataqatigiinneersoq, oqarpoq.
Savaatillik paaserusutaat naalakkersuisunit akineqarsimannginneri Avatami siulittaasup ajorluinnartutut isigaa.
- Savaatilinnit peqatigiiffianiillu apeqqutigineqartut tulluarluinnarput. Ajorluinnarporlu akisussaasunit apeqqutit akineqarsinnaanngimmata, Avatami siulittaasoq Mikkel Myrup oqarpoq.
Qanoruup ilanngutassiai takukkit.