SAS-ip sulisumi ilarujussui coronap ajornartorsiortitsinerata malitsigisaanik soraarsippai, timmisartuutileqatigiiffik paasissutissiivoq.Assi: SAS AB

SAS-ip sulisumi affai soraarsikkai

SAS-ip Danmarkimi sulisui 1700-it missaanniittut coronap ajornartorsiortitsinerata malitsigisaanik soraarsitaasussanngorput.

Coronap ajornartoortitsinera pissutaalluni timmisartuutileqatigiiffik SAS sulisunik 5000-inik soraarsitsisariaqalerpoq.

SAS tusagassiutinut taama ullumi nalunaaruteqarpoq.

SAS-imi sulisut affangajaat taamaasillutik soraarsitaasussanngorput.

Soraarsitaasussat 5000-it akornanni 1700-t missaat Danmarkimi sulisuupput.

AAMMA ATUARUK Nunarsuarmi silaannakkut angallattut ikileriarujussuarsinnaasut

Atorfiit sinneri Sverigemiillutillu Norgemiipput. Eqqornerusumik oqaatigissagaanni Sverigemi 1900-it Norgemilu 1300-it missaanniittut soraarsinneqassapput.

Coronap ajornartoortitsinera pissutaalluni SAS-ip aningaasarsiornera ajornartoorpoq.

SAS timmisartuutileqatigiiffiillu allat virusip tuniluunnerata annikinnerulersinniarnera pissutigalugu nalinginnaasumik timmisartuussisinnaasimanngillat, taamaalilluni SAS-imut ilaasut ikinnerullutillu aningaasanik isaatitakinneruvoq.

Aasaq nalinginnaanngitsoq

Aamma naak aningaasanik ikiorsiissuteqartoqarneratigut timmisartuutileqatigiiffiup sulisumi amerlanerpaartai angerlarsimatillugit akissarsiaqartissinnaasimagaluarai, tamanna SAS-ip soraarsitsinnginnissaanut iluaqutaasinnaasimanngilaq.

- Marsip ulluisa aallartinneranit imaluunniit qaammatip eqqani piffissaq imaannaanngitsunngormat angalarusussuseqartoqaqqipallalertornissaa aasaaneralu nalinginnaasuupajaassasoq ilimagisimagaluarparput.

- Pissutsit aasaq manna allaanerunissaat nalunngilarput, timmisartuunneqartussallu pisarnermit ikinnerunissaat aamma nalunngilarput, SAS-ip pisortaanera Rickard Gustafson oqarpoq.

Ukiup sinnerani timmisartuussinissat aamma ikinnerunissaat aamma naatsorsuutigineqartoq taassuma aamma oqaatigaa.

Angalaniartukinnerata 2020-p sinnerani taamaannissaa 2021-milu immaqa pitsanngoriartortoqalernissaa taassuma ilanngullugu oqaatigaa.

Coronap ajornartoortitsinerata siorna pissutsit 2022-mi aatsaat atuutileqqinnissaat taassuma ilimagaa.

Isummersuutit