SAS-ip Air Greenlandimut piginneqataassutsini tunerusukkaa

 Air Greenlandimi pingaarnersiuinermik sinneqartoorutinillu nakkutiginninnerulernissaq, Inuit Ataqatigiit kissaatigigaat, Aqqaluaq B. Egedep marlunngormat nalunaarutigaa.

Tamanna Namminersorlutik Oqartussat nunat avannarliit ataatsimoortumik timmisartuutileqatigiiffiata, SAS-ip, maanna piginneqataassutigisai, maanna 37,5 procentiusut,  danskillu naalagaaffiata piginneqataassutai, 25 procentiusut, pisiarippagi pissaaq.

SAS-illu piginneqataassutini tunerusukkaa, suliffeqarfiup attaveqaqatigiinnermut pisortaata, Mariam Skovfoged KNR-imut oqaatigaa. SAS-ip Air Greenlandimik piginneqataassutini tuniniarsimagaluarai, tamannali iluatsinngitsoq, nittartakkatigut tusagassiisarfiup, Check-in.dk-p 2012-imi allaaseraa. 

AAMMA ATUARUK Demokraterne vil undersøge privatisering af Air Greenland

Piginneqataajunnaarnissamullu suli soqutiginnillutik, SAS KNR-imut mailikkut allappoq.

- Aap, suli kissaatigaarput. Air Greenlandimik piginneqataaginnarnissarput uagutsinnut siunissami periusissatsinut naleqquttusorinngilarput, Mariam Skovfoged allappoq.

Namminersorlutik Oqartussat SAS-ip piginneqataassutai pisiarigaluarpatigit, suliffeqarfiup 75 procentia pigilissavaat, taamaalillutillu piginneqataassutitigut amerlanerussuteqalissallutik. Danskilli naalagaaffiata piginneqataassutaasa 25 procentiiusut pigilernissaa qularnarneruvoq.

Danskit naalakkersuisuisa Air Greenlandimik piginneqataassutitik tuniserusussinnaaneraat oqaaseqarfiginiarnagu, Aningaasaqarnermut ministereqarfik KNR-imut mailikkut paasissutissiivoq.

AAMMA ATUARUK Air Greenland skal ejes helt af Grønland