Sara Olsvig Pituffik pillugu: Illersornissamut isumaqatigiissutit isumaqatigiinniutigeqaqqittariaqarput
Amerikamiut Pituffimmi kiffartuussinissamut isumaqatigiissusiormata USA-mik isumaqatigiissummut naapertuutinngitsoq IA-p siusinnerusukkut erseqqissaatigereeraa taassuma eqqaasitsissutigaa.
Taamaattumik suliariumannittussarsioqqinnissaq siulittaasup nuannaarutigaa.
Aamma atuaruk Lidegaardip Pituffik pillugu aalajangiisoqarnera nersualaaraa
- Nuannaarutigaarput tamanna aamma massakkut naqissuserneqarmat. Massakkulli misissugassaraarput, sooq taamatut kukkuluttornikkut taamatut pisoqarsimanersoq, nunatsinni aammalu danmarkimi, Sara Olsvig taama oqarpoq ilanngullugulu naqissuserlugu, nunanut allanut tunngasunut aamma illersornissamut tunngasunut ataatsimiitsitaliaq nutaarsiassamik suli uppernarsaaffigineqanngimmat.
KNR-mi ippassaq oqaluttuaraarput Amerikap sakkutuuisa Pituffimmi kiffartuunneqarnissaannik suliariumannittussarsiuussisimaneq pillugu kalaallinit danskinillu piginneqataaffigineqartup, Greenland Contractors I/S-ip aamma danskit suliffeqarfiisa Per Aarslef A/S-ip aamma Copenhagen Arctic A/S-ip maalaaruteqaataat, Amerikami eqqartuussivimmi atuuttussanngortinneqarsimasoq.
IA-mit Illersornissamik isumaqatigiissutit nutartertariaqarsorineqarput
USA-mi Court of Federal Claimsip aalajangernera isumaqarpoq, oktobarip aallaqqaataani Exelis Servises A/S-mit aallartinneqartussaagaluartoq unitsiinnarlugu pituffimmi suliariumannittussarsiortussamik nutaamik ujaasisoqassasoq.
Sara Olsvig isumaqarpoq Kalaallit Nunaat taamatut nalaataqaqqissanngippat, kiffartuussinissamik isumaqatigiissutinik allanngorartunik assigiinngitsunillu tunngaveqarnissaq qajannarpallaartoq.
- Apeqquserujussuarparput nunatsinnut taakku taamaallaat atussagaanni naammannersut. Taamaammat suli Inuit Ataqatigiinniit oqarpugut, illersornissamut isumaqatigiissutit isumaqatigiissutigineqaqqittariaqarput, taamaalilluta aalaakkaanerusumik aammalu paasinarnerusumik nunatsinnut iluaqutissaanik peqalerniassagatta pituffiup nunatsinniinneraniik, Sara Olsvig, Inuit Ataqatigiinni siulittaasoq taama oqarpoq.
