Lidegaardip Pituffik pillugu aalajangiisoqarnera nersualaaraa
Danmarkip nunanut allanut tunngasunut ministeria Martin Lidegaard, nutaarsiassaqartitsivimmut Ritzauimut ullumi taama oqarpoq.
- Amerikami eqqartuussiviup qallunaat suliffeqarfii ilumoornerarpagit, Pituffimmi sullissinissamik isumaqatigiissutip Danmarkip illersornissamik USA-mut isumaqatigiissutaanut ilaalluinnarneranik takussutissaavoq, Martin Lidegaard oqarpoq.
Exelis Servicesip Pituffimmi sullissinissamik naammassinnissinnaanngitsoq, USA-mi eqqartuussiviup maalaaruteqartarfiup nalilerpaa. Eqqartuussiviulli taama aalajangiinera suliffeqarfiup - USA-milu illersornissaqarfiup - eqqartuussivitsigut suliareqqitassanngortissinnaavaat.
AAMMA ATUARUK Pituffimmi kiffartuussinissamik isumaqatigiissut Exelis Servicesip annaavaa
USA-mi illersornissaqarfiup suliariumannittussarsiuussinermut atatillugu aalajangiisuusussaasimanera pillugu Danmarkip nunanut allanut tunngasunut ministereqarfia, Namminersorlutillu Oqartussat nunanut allanut tunngasunut aqutsisoqarfia isornartorsiorneqangaatsiarput.
Naak USA-mi eqqartuussivik maalaaruteqartarfik Exelis Servicesip Pituffimmi sullisinissamut isumaqatigiissutaanik atuuttussaajunaarsitsigaluartoq, partii Venstrep Kalaallit Nunaannut tunngasunut oqaaseqartitaata Troels Lund Poulsenip isornartorsiuineq attattuarsinnarpaa:
- Martin Lidegaardip tatiginassusaa innarlerneqarujussuarpoq, Pituffimmilu sullissinissamut isumaqatigiissummut atatillugu suliamik aqutsinerliorsimanera ersarippoq, suliarmi soqutaanngitsutut nalilersimavaa, Lund Poulsen ilaatigut oqarpoq.
Folketingimut qinersinissamut isumasiuinerit inerneri piviusunngussappata, partii Venstre naalakkersuisuutitaqalissaaq, taamalu pisoqarpat pisimasut misissorneqassasut, paasissutissallu tamanut saqqummiunneqassasut, Troels Lund Poulsen oqarpoq.
