PITUFFIK Pituffimmi kiffartuussinissamik isumaqatigiissut Exelis Servicesip annaavaa

Pituffimmi sakkutooqarfimmi kiffartuussinissamik isumaqatigiissut suliariumanittussarsiuunneqaqqittussanngorpoq. USA-mi eqqartuussivimmi Court of Federal Claimsimi tamanna aalajangiiffigineqaqqammerpoq. KNR-imit tamanna paasineqaqqammerpoq.

Taamaalilluni suliffeqarfiup Amerikamiunit pigineqartup Exelis Services A/S-ip  kiffartuussinissamik isumaqatigiissut annaasussanngorpaa, taassuma oktobarip aallaqqaataani sullissineq tigusussagaluarpaa.

Suliariummanittussaarsiuussinermi piumasaqaatigineqartut Exelis Servicesip naammassisinnaasimanngikkai, eqqartuussivimmi naliliiffigineqarpoq. 

Suliffeqarfik Greenland Contractors I/S danskinit kalaallinillu pigineqartoq aamma suliffeqarfiit Per Aarslef A/S aamma Copenhagen Arctic peqatigiillutik, Pituffimmi kiffartuussinissamik isumaqatigiissutip suliariumannittussarsiuunneqarnera naammagittaalliuutigalugu Amerikami eqqartuussivimmut suliassanngortippaat, suliariumannittussarsiuussineq Amerikamiut illersornissaqarfiannit suliarineqarpoq.

Aamma atuaruk Nunanut allanut tunngasunut ministereqarfik atorfilittanik Pentagoniliartitsisoq

Greenland Contractorsini pisortaq Peter Kofoed aalajangerneq pillugu KNR-imut ima oqarpoq:

-  Saqqummiussatta ilalerneqarnerat soorunami aallaqqaammut naammagisimaarparput - tassalu Exelis Services A/S isumaqatigiissuteqarnissamut piumasaqaataasut naammassisimanngimmagit. Taamaattumik naammagisimaarinnippugut. Taava qanoq pisoqaqqissanersoq utaqqisariaqassavarput.
Naammagittaalliuutip USA-mi Court of Federal Claimsimi ingerlanneqarnerani, Danmark Kalaallit Nunaallu USA-mik politikkikkut isumaqatigiinniarput.

Aamma atuaruk Tusagassiuut: USA-p Pituffik pillugu akerleriinnermi Danmark itigartippaa

Tassani Namminersorlutik Oqartussani Nunanut allanut naalakkersuisoqarfik, Nunanullu allanut ministereqarfik Danmarkimiittoq amerikamiunut Exelis Services A/S-ip isumaqatigiissutaata sivikillineqarnissaa isumaqatigiinniutigisimavaat - imaagunarpoq minnerpaamik ukioq ataasiinnanngorlugu. Nunanut allanut tunngasunut ministeri Martin Lidegaard siusinnerusukkut taama oqarsimavoq.

USA-p Court of Federal Claimsimi eqqartuussinerata inernera pissutigalugu maanna ima isikkoqalerpoq; Exelis Services A/S Pituffimmi sullissilernavianngitsoq.

Aamma atuaruk Thule Air Base



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat