Sara Olsvig: NunaOil pillugu akissuteqartoqarli

NunaOil siunissaalu pillugu suli apeqquterpassuaqarpoq akineqanngitsunik, Inuit Ataqatigiit siulittaasuat, Sara Olsvig, KNR-imut allappoq.
Allattoq Karsten Sommer
oktobarip 21-at 2014 08:06

Naalakkersuisut sunik suliffeqarfimmut piumasaqaateqarsimappat, siulersuisuinik tunuartitsisumik, qinersuisoqarnissaanullu suaarutigineqarnerata kingorna piumasaqaatit saqqummiunneqarpat, Sara Olsvig apereqqippoq.

 

Naalakkersuisut siulittaasorigallagaat, Kim Kielsen, qinersinissap suaarutigineqarnerata kingorna partiit siuttuinik marloriarluni ataatsimiigiaqqusivoq.

 

- Apeqqutigulli suli akineqanngillat, tamannalu ernumanartoqarsoraarput. Nalunaarummilli suli takusimanngisatsinnik nassiussisoqarnissaa neriorsuutigineqarpoq, IAp siulittaasua KNR-imut allappoq.

 

- Isumaqataavugut sipaarfigineqarsinnaasut sipaarfigineqassasut, aamma NunaOilimi.

- Ingerlatseqatigiiffiulli aningaassaqarneranut inatsisinut tunngavilersugaanngittumik politikkikkullu eqqartorneqaqqaarsimanngittumik taama annertutigisumik allannguineq akuerinngilarput.

- Nalorninartumik naalakkersueriaaseqarneq unittariaqarpoq, Inuit Ataqatigiit siulittaasuat, Sara Olsvig, taama oqarpoq.