Sara Olsvig: Inatsisitigut ataataqanngitsunik assigiinngisitseqqittoqassanngilaq
”Danskit isumaginninnermut ministeriata tusagassiorfinnut erseqqissumik oqaatigaa, inatsisitigut ataataqanngitsut ataataminnik toqukkut qimaguttoorsimasunut tunngatillugu kingornussassat pillugit sulianik matuneqareersimasunik ammaaqqinnissaq kissaatiginagu. Tamanna paasinarpoq, kisianni aamma inatsisitigut ataataqanngitsut ilaasa tamanna aporfigisinnaassagaat ilimagineqarsinnaavoq, taamaalillutimmi inatsitisigut ataataminnik toqukkut qimaguttoorsimanngitsunut kingornussassanullu tunngatillugu suliamik aallartitsisimanngitsunut naleqqiullugit allaanerusumik pineqassammata, Sara Olsvig oqarpoq.
Tamannalu tunngavigalugu Sara Olsvigip § 20 naapertorlugu (Nunatsinni § 37-mik apeqquteqaatit assingat) Folketingikkoortumik danskit isumaginninnermut ministeriannut apeqquteqaateqarpoq. Apeqquteqaatimini ilaatigut paaserusuppaa, inatsisitigut ataataqanngitsut ataataminnik toqukkut qimaguttoorsimasut kingornussassatigullu sulianik matusereerfiusimasut eqqumaffigineqanngippata assigiinngisitsinermik nutaamik pilersitsoqarsinnaanera isumaqataaffigineraa. Aammattaaq ministerimut apeqqutigaa kingornussassanik annaasaqarsimanermi danskit naalagaaffiata taarsiissuteqarnissamut periarfissanik misissuerusussinnaassanersoq.
"Naalagaaffiummi suliamik matuminnga qaqitsinissaminut piffissamik taama sivisutigisumik atuisimanera inatsisitigut ataataqanngitsup tunngaviatigut pisuussutiginngilaa, aamma inatsisitigut ataataqanngitsup ataatani suli uumanersoq naalagaaffigisinnaanngilaa. Taamaammat inatsimmik allanngortitsineq assigiinngisitsinermik nutaamik ajoraluartumik pilersitsisinnaavoq, tamannalu tulluussorinngilara, Sara Olsvig oqarpoq.
Sara Olsvigip inatsisitigut ataataqanngitsut pillugit suliaq danskit isumaginninnermut ministeriannik ataatsimeeqateqartarnermini ingerlaavartumik qaqittarpaa. Danskit naalakkersuisuisa inatsisitigut ataataqanngitsut inatsisitigut inissisimanerat pillugu inatsisissatut siunnersuut qangarsuarli saqqummiuttussaagaluarpaat. Inatsisip allanngortinnissaanut siunnersuut maanna kingumut kinguarteqqinneqarpoq. Danskit isumaginninnermut ministeriaqarfia naapertorlugu inatsisip allanngortinneqarnissaanut siunnersuut ukiaru saqqummiunneqartussatut pilersaarutigineqarpoq.
”Suliaq tamarmi inuttut pisinnaatitaaffeqarnermut tunngatillugu ajornartorsiutitaqarpoq. Naalagaaffiup tamanna qangali ilisimareerpaa, inatsisillu allanngortinneratigut suliaq assigiinngitsitsinermik nutaamik pilersitsiffiutinnagu naammassisariaqarparput”, Sara Olsvig naggasiivoq.
Sara Olsvigip Karen Hækkerupimut apeqquteqaatai uani atuarsinnaavatit:
http://www.ft.dk/samling/20121/spoergsmaal/s1847
