Sara Olsvig: Dansk Folkeparti sinissimagunarpoq
- Siornatigut ministeriunerusimasup Lars Løkke Rasmussenip aamma Kristian Thulesen Dahlip maanna aatsaat qisuariarnerat paasisinnaanngilara. Namminersulernissamut kommissionimi qallunaanit kalaallinillu ilaasortaaffigineqartumi sulinerup nalaani taakku pissaanermik tigumiaqartuupput, aningaasaliinissamullu tunngasunik suliniuteqanngilluinnarlutik, Sara Olsvig oqarpoq.
Taanna isumaqarpoq Nunatta pisuussutaanik atuinissamut Danmark aamma qallunaat suliffiutaat naammattunik pissutissaqarluarsimagaluartut.
- Nunatsinni aatsitassarsiornikkut suliffissuaqarnermik ineriartortitsinissamut aningaasaliisartut milliardikkaanik atuinissaminnut pilerngussimanngimmata piviusuuvoq. Aallartittariaqarpugut, kisianni suna tamaat akiginagu. Suut tamarmik oqimaaqatigiissaartariaqarput, Sara Olsvig erseqqissaavoq.
Taanna Norgemi Tromsømi ataatsimeersuarnermi Arctic Frontiers-imik taaneqartumi, oqalugiartunut pingaarnernut ilaavoq.
Naak Thulesen Dahlip qallunaat soraarnerussutisianut aningaasaateqarfiisa aningaasaliinissaannut tunngatillugu namminersortut pisortallu suleqatigiinnissaannik siunnersuutaa soqutiginaraluartoq, aningaasat suminngaanneernissaat takujuminaatsikkini Sara Olsvigip erseqqissarpaa.
- Kalaallit landskarsiannit aningaasaliisoqarnavianngilaq. Tassami Naalakkersuisut 2025-imut pilersaarutaanni erseqqissumik tikkuarneqareerpoq, Nunatta karsia milliardikkaanik aningaasaliisinnaanngitsoq, Sara Olsvig oqarpoq.
