Sara Olsvig: Ataavartumik aningaasaliisoqartartuugaluarpat pitsaanerussagaluarpoq

- Tamanna nuannaarutissaavoq, aningaasaliissutilli kingusissukkut takkupput, aappaagumullu aamma aningaasaliisoqarani, Inuit Ataqatigiit sinnerlugit folketingimut ilaasortaq Sara Olsvig oqarpoq:

- Aningaasat uku nassaarinissaat sivisoorujussuarmik sulissutiginikuuarput. Danmarkimi partiit immikkut ittumik aningaasaliissutissanik isumaqatigiissusiortut iliuuseqarniarlutik ukiarmili neriorsuipput, kisianni isumaginninnermut ministereqarfimmit allagaqaat Danmarkimi Kalaallit Illuutaannit ajoraluartumik januaarip 17-iani aatsaat tiguneqarsimavoq, suliniutillu ilai taamaattumik decembarimili matuneqartariaqarsimallutik, Inuit Ataqatigiit sinnerlugit folketingimut ilaasortaq Sara Olsvig oqarpoq.

Suliniutinut assigiinngitsunut aningaasaliisoqarnissaa, Danmarkimi Kalaallit Illuutaat ukiarmili utaqqisimagaat, Sara Olsvigip oqaatigaa.

Aningaasaliisoqarnissamik nalunaarut ukioq manna januaarip 17-iani aatsaat nalunaarutigineqarpoq, tamannalu pissutaalluni suliniutit arlallit siorna matuinnarneqartariaqarsimallutik.

Suliniutit assigiinngitsut katillugit 4,3 millionit koruuninik ukioq manna aningaasaliiffigineqarput, aappaagumulli aningaasaliisoqarsimanani.

- Tamanna ajuusaarnaqaaq, Sara Olsvig oqarpoq, nangillunilu:

- Ukioq mannamut aningaasaliissutit aaqqinneqarnerat soorunami nuanaarutigisorujussuuara, Danmarkimili Kalaallit Illuutaat ukiup tullissaanut aningaasassaqarnerlutik nalullugu ukiut tamaaviisa misigisarpaat, tamannalu soorunami akuersaarneqarsinnaanngilaq. Aamma isumaginninnermut ministereqarfimmut qangali oqaatigisaqattaarparput taamatut ingerlatsisoqarnera akuersaarneqarsinnaanngitsoq. Ukiuni qassini amerlasuuni aningaasassaqassanerlutik ilisimasariaqarpaat, suliniutitik ataavartumik taamaasillutik ingerlassinnaaniassammassuk, Inuit Ataqatigiit sinnerlugit folketingmut ilaasortaq Sara Olsvig oqarpoq.

Isumaginninnermut ministerip Karen Hækkerupip 2013-imit 2016-imut isumaginninnermut akuunerulersitsinissamullu suliniutinut isumaqatigiissutissap oqaasertassai, oktobarip naajartulernerani saqqummiuppai. Taakkunani ukiuni sisamani atuuttussatut Danmarkimi kalaallinut atugarliortunut meeraanullu suliniarnermi 13,4 millionit koruunit atugassanngortinniarneqarlutik.

Ajornartorsiulli tassaavoq aappaagumut suliniutinut aningaasaliissutit qassiunersut nalunaarutigineqanngimmat.