Saqqaq tuttunit ungaluneqarsimavoq

Ilulissat avannaanni Saqqami tuttorpassuaqartoq, nunaqarfimmiut oqarput.

Saqqameersup William Jensenip nunaqarfimmi eqqannguani tuttorpassuit qanillattortut, nujuillisimagamillu qimuttunut akornutaasalersimasut oqaluttuarai.

Taamaammat tuttunniarsinnaalernini nuannaarutigeqaa.

- Qanillingaluttuinnavittorsuugamik, qimussernerit kingulliit assut ajornartornartorsiutaasaqattaarlutik qanillutik, qimmit pilerigisorujuusaramikkit, taavalu piniagaanatik. Tusaratsigu assut nuannaajallannarpoq, aamma aqaguani ullap tungaani piniarpugut, qimussit arlaliulluta nuannertorujummik, tappikaneralaannguaq Saqqap quleralaannguani, William Jensen oqarpoq.

William Jensenillu eqqaavaa, tuttunniarsinnaatitaanissartik sioqqullugu, tuttut nujuilleruttoramik qimussit allaat ornittalersimagaat, taamaaligaangatalu qimmit pilerinermit tuttut sannguigisalersimavaat. 

Tuttorpassuit nunaqarfimmut qanillattornerinut piniartup peqqutaasoraa, siallernerata qaqqat taakkualu tungaanni aput serminnguussimanera, tuttut taamaalillutik appasinerusumut aputikinnersiorlutik nerisassarsiorlutik.

Tuttunniarnissaq ammaanneqarmat, Saqqarmiut qimussit sisamaallutik tuttunik arfineq pingasoraarput.

Nuussuarmi Ukiuunerani tuttunniarneq ippassaq februarip 17-ani aallartippoq, tuttuttassallu amerlassusilerneqanngillat.