Saputini nuna ikuallattoq
Saqqap Qeqertallu akornanni piffimmi ikuallattoqarunartoq, Qaasuitsup Kommuniata Qatserisartui umiarsuarmiit ataasinngormat ualikkut kalerrinneqarput.
Qatserisartut qatserisartumik piffimmut misissuiartortitsipput, kingunitsianngualu qatserutit qatserisartullu umiarsuarnik pingasunik piffimmut aallartinneqarput.
AAMMA ATUARUK Nassuttuumi nuna ikuallattoq
Qatserisartut Saputini qamitsiniarnerminnut allanit marlunngornermi ikioqqupput. Ilulissani qatserisartut qatserinermut ikiuukkiartorlutik atortussaminnik nassarlutik marlunngornermi ullaakkut 9.30 aallarput.
Nunap ikuallannera qanoq annertutiginersoq ikuallanneralu qaqugu qaminneqarsinnaassangatinneqarnersoq oqaatigisinnaanngikkallarlugu, Qaasuitsup Kommuniata Qatserisartuisa paasissutissiissutigaat.
Kangerlussuup eqqaani Nassuttuumi nuna sapaatip akunnera kingullerli ikuallalerpoq. Ikuallattoq piniartunut piffimmi tassani tuttunniarusuttunut sunniuteqarpoq.
Innuttaasut pinngortitamiitsillutik innermik atuinerminni mianersussasut oqartussat kaammattuutigaat.
AAMMA ATUARUK Nassuttuumi ikuallannerup aavarnissaq akornuseraa
AAMMA ATUARUK Sisimiut pinngortitami ikuallannermit eqqugaasoq
