Nassuttuumi ikuallannerup aavarnissaq akornuseraa

Ikuallattoq oqartussat nakkutigaat qamisarnissaanullu periarfissarsiorlutik. Piniartup Erik Nielsenip tuttunniarniaraluarluni ikuallattoq pujoqimmat utiinnartariaqarsimavoq.

-Tassa utiinnarpugut taamaattoq aavarfigisinnaannginnatsigu tamarsuarmi pujorsuanngorsimagami tappanna aamma qinnguatungersua, Erik Nielsen oqarpoq.

Taassuma oqartussat iliuuseqarnissaat kajumissaarutigaa. Nunap ikuallattup qamisarneqarnissaanut periarfissat maanna misissorneqaleruttortut, Qaasuitsup kommuneani upalungaarsimanermut pisortaq Bjarne Gregersen KNR-imut oqarpoq.

Inuit Ataqatigiit politikkikkut oqaaseqartartuata Bendt B. Kristiansenip nunap ikuallattup qanoq siaruaassimatiginera takoreerlugulu aamma iliuuseqaqqusivoq.

- Ernumanaqaaq ukiup sinneranut ukiunilu tulliuttunut tuttoqassutsimut qanoq sunniuteqassanersoq, piniartullu aaffarmik ilisimaarinnilluartut pisoq alianarluinnartutut nalilerpaat, tusagassiuutinut nalunaarummi allappoq.

Silasiortut ilimasaarutaat naapertorlugu Nassuttuumi ulluni qanittuni sialussaqanngilaq. 

- DMI.dk malillugu nunap timaani august-ip ingerlanerani sialussakippoq, taamaattumik ajornartorsiut annertusingaluttuinnassanngippat Naalakkersuisut kommunit peqatigalugit piaartumik iliuuseqapallannissaat ilungersuullugu kaammattuutingaara.