Sapaatip akunnerata naanera nipilersorfiungaatsiassaaq
![](/sites/default/files/styles/image_934x467/public/article_images/henrik_hoyer_jensen630_2.jpg?itok=lsSiuUFx)
Nipiaa Rock Festival Aasianni unnugu ingerlaqqissaaq tassanilu Thornestone, Nanook aamma Ole Kristiansen appisimaassapput. Festival taanna nuannarineqartaqisoq qallunaap tusaamasarsuup Medinap peqataaffigisussaagaluarpaa. Aggustili aallartilaartoq nalunaarpoq peqataasinnaajunnaarluni.
Arfininngornermi Aasianni appisimaartussat tassaapput Nina, Small Time Giants aamma Uummat.
- Aasianni festivalertoqarnerata inuit sunnersimaarai malunnarpoq. Ajoraluartumik ippassaq Qeqertarsuup tunuani avannerami arlallit Aasiannukarniaraluit saperngutillugit. Maanna anorikillisimasorsuummat ilimanarpoq tikerartoqarluarumaartoq aamma, Nipiaa Rock Festivalimiit Peter Olsen KNR-mut oqarpoq.
Nipilersoqatigiit 'A Circumpolar Soundscape' Aasianni sisamanngornermi unnukkut appisimaarput assullu nuannarineqarlutik. Taakku angalanertik ullumi Sisimiunut nangissavaat unnugu kulturip illorsuani Taseralimmi tusarnaartitsissallutik.
Angalanertillu arfininngornermi Nuummut nangissavaat. Nuuk Festival unnugu timersortarfissuarmi Inussivimmi aallartissaaq. Tassani Dida aallarniissaaq taannalu pereerpat arnat erinagissut Lotte, Varna aamma Tupaarnaq imminnut Diva-mik taagortut appisimaassapput. Iluliarmiut bluesertartut Disco Bay Blues tallimanngornermi kingulliullutik appissapput.
Nuuk Festival arfininngornermi ingerlaqqippat Henrik Høyer Jensenip nipilersoqatigiivi Kishima appisimaasapput. Issittormiut arnat 'A Circumpolar Soundscape' aamma appissapput Nuuk Festivalilu naggaserlugu Qarsoq appisimaassapput.
- Nuuk Festivalimi nipilersoriaatsit assigiinngisitaarluarput nipilersoriaatsit, rock, pop, bluesrock nipilersoriaatsillu allat atorlugit appisimaartoqassammat, Nuummi illorsuarmi timersortarfimmi Nuuk Festivalimik aaqqissuisuusumi pisortaq Jens Berthelsen nalunaarpoq.
Sapaatip akunnerata naanerani Rasmus Lyberth aamma Nuummiissaaq Hotel Hans Egedep nalliuttorsiornerani neriartortunut appisimaassalluni.
Nipilersorluni tusarnaagassiaq 'Qullissara' aamma arfininngornermi sapaammilu kulturikkut illorsuarmi Katuami tusarnaartitsissutigineqassaaq.
Taamaasillutik nipilersoqatigiit 14-it Aasianni, Sisimiuni Nuummilu sapaatip akunnerata naanerani appisimaartussanngorput.
Så der er ikke færre end 14 grupper, der giver koncert i Aasiaat, Sisimiut og Nuuk i aften og imorgen.