Sapaammi immiaaqqat tunisaaleqquai
- Sooq sapaammi nerilluarsaatissamii pisiniarfinni viinnissisinnaanngilagut ajornaquteqanngitsumik imerniartarfinni neriniartarfinnilu pisiarisinnaallugit, taama ammassumik aperivoq Malik Berthelsen siunnersuumminut atatillugu.
Taamatut Malik Berthelsenip Inatsisartut upernaajunerani katersornerannut siunnersuuteqarnermi anguniarneqanngilaq imigassamik atuinerup qaffannissaa.
Siunnersuut aqqutigalugu allanngortinniarneqarpoq imigassat nalunaaqutaq arfinernut matulerneranni pisiniuttarnerujussuaq.
- Siunnersuutaavoq imigassap putumaniutaannartut ilaatigut isigineqartarnerata annikillisinnissaanut aqqutaasinnaasutut isumaqarfigigakku, Malik Berthelsen siunnersuummini allappoq.
Ullumikkut pisiniarfiit imigassamik nioqquteqartarput ulluinnarni nalunaaqutaq 09.00-miit nalunaaqutaq 18.00-ip tungaanut arfininngornikkullu nalunaaqutaq 09.00-miit nalunaaqutaq 13.00-ip tungaanut. Sapaammi nalliuttunilu pisiniarfinni imigassaq matoqqasarpoq.
Malik Berthelsenip siunnersuutigaa pisiniarfinni imigassamik nioqquteqartarneq sivitsorneqassasoq sapaatip akunnerata ulluini tamani unnukkut qulingiluat tungaanut pisartussanngorlugu.
Malik Berthelsen naliliivoq siunnersuut imerniartarfinnut annerusumik kinguneqarnavianngitsoq.
- Imerniartarfiliakaasarneq naliginnaaneruvoq matunissaanut nalunaaquttap akunnera ataasiinnanngorat marlunngoraangataluunniit, Malik Berthelsen oqarpoq.