Sapaammi imigassat nioqqutigineqartalissanngillat
- Imigassanik tuniniaasarneq sivitsorneqarpat aalakoorniaannarlutik imertartut amerlinissaannut aalleqquteqaratta, imigassanillu aamma suli amerlanerusunik, ilaartuilluni pisiniartoqartalernissaanik aarleqquteqaratta siunnersuut ilalernartinngilarput, Agathe Fontain allappoq.
Tamannarpiarli qitiunngikkaluarpoq Siumumeersup Malik Berthelsenip Inatsisartunut siunnersuuteqarnermini tunngavilersuutaani.
- Siunnersuut innuttaasut imernerulernissaannik neriuuteqarluni siunnersuutaanngilaq, Malik Berthelsen siunnersuunni ilaatigut taama tunngavilersorpaa.
- Ullumikkut imigassamik pisiniartut ataatsikkorsuaq inortuilersutut ilaatigut pisiniartarput. Pisiniartarneq sivitsorneqarpat angumersiniaallunilusooq, ingammik tallimanngornikkut arfininngornikkullu pisiniartoqarunnaassagaluarpoq, Malik Berthelsen allappoq.
Imigassamilli atuinerup ammasarfiit aqqutigalugit aqunneqarnissaa Naalakkersuisut suli ingerlanniarpaat.
- Imigissanik pisiniartarfiit sivitsorneqarpata inuit aalakooqalutik pisiniartut takussaanerulernissaat ilimagisariaqartoq qularnanngilluinnarpoq, Agathe Fontain akissutimini ilaatigut taama allappoq.
Malik Berthelsenip siunnersuutaa siullermeerlugu aqagu, sisamanngornermi oqaluuserineqassaaq.
