Sanaartorneq unitsinneqarallartoq
Nunap ilumut qaffassinnaanera soorunami upperiuminaassinnaagaluarpoq, tamannali maanna issinnerup naligimmagu nunallu sanaartorfiusup issuuneranik peqquteqartoq, Kommuneqarfik Sermersuumi sanarfinermut avatangiisinullu ingerlatsivimmi atorfillit pisortaata Hans Henrik Winther Johannsenip nassuiaatigaa.
- Sanaartorfiusup kinneqarfiusumiinnera masarsummiinneralu pillugu sanaartugaq qaffalaarsimavoq taamaalillunilu sanaartorniarneq ajornarsisillugu, Hans Henrik Winther Johannsen KNR-imut oqarpoq.
Issik kinnerlu tullianngillat
Tassalu kinnerup masarsuummiinneratigut nuna qerimmat sanaartugaq qaffassimavoq.
Taamaanneratalu kommunip inissialiarititaa ataaseq eqqorpaa.
Aamma atuaruk MT Højgaard Nuummi inissianik 126-nik sanaartulersoq
Nunallu qaffannerata inissiliamik ataatsimik sanaartorneq kinguaattoortippaa, inissialialli allat marluk ingerlatiinnarneqarsinnaammata sanaartorneq atatsimut isigalugu kinguaattoornavianngitsoq, Hans Henrik Winther Johannsen oqarpoq.
- Pisoq nuanninngilaq, takoriartiguli, sanaartorneq siusissukkut unitsipparput neriuutigaarpullu tamaannera akornutaarujussuassanngitsoq, atorfillit pisortaat oqarpoq.
Silap aalajangissavaa
Nangillunilu nassuiaavoq.
- Suliamik unitsitsiaarneq, sanaartornerup ajoquserpallaannginnissaanut ajunnginnerpaamillu inerneqarnissaanut pingaaruteqarpoq.
Maskinat sulisullu qaqugu aallarteqqissanersut silap qanoq innerata aalajangissavaa.
- Nunap qeriunnaajaarpat suliamik aallartitseqqipallassinnaavugut, Hans Henrik Winther Johannsen oqarpoq.