MT Højgaard Nuummi inissianik 126-nik sanaartulersoq
![](/sites/default/files/styles/image_934x467/public/article_images/tujuuk_0.jpg?itok=gDsTLJjl)
![](/sites/default/files/styles/image_934x467/public/article_images/tujuuk2.jpg?itok=Fc1mkOc1)
![](/sites/default/files/styles/image_934x467/public/article_images/tujuuk1.png?itok=UoHQGsyn)
![](/sites/default/files/styles/image_934x467/public/article_images/nuuk-tjuuluk.jpg?itok=Bokvs9Ku)
Kommuneqarfik Sermersuup Tuujummi inissiarsuarnik pingasunik sanaartortitsinissaa matumani pineqarpoq, taakkulu tamarmik immikkut 4.000 kvadratmeterinik angissuseqassapput 2019-imilu aggustip qaammataani naammassineqareersimassallutik. Najugaqartussalli siulliit 2017-ip aallartinnerani nooreersinnaassasut Kommuneqarfik Sermersooq tusagassiutinut nalunaarummi allappoq.
MT Højgaardip inissiat 126-t sanaartorlugit qaammatip tulliani aallartissavai, toqqavissat siulliit suliarineqassallutik.
MT Højgaardip betonilerineq, sanaartorneq qalipaanerlu suliarissavai. Innaallagissamut tunngasut Arssarnerit, MT Højgaardimit aamma pigineqartup, suliarissavai, nunamillu assaaneq, VVS aammalu silaannarissarfilersuineq Larsen & Comit HJ-Tek-imillu suliarineqassallutik.
- Suliassamik angissutsimigut annertussutsimigullu piginnaasatsinnut tulluuttumik suliassaqalernissarput utaqqisimavarput, Nuummilu takussaaneruleqqinnissarput assut nuannaarutigivara, Jóannes Niclassen, MT Højgaardimi pisortaq taama oqarpoq.
Inissiarsuit Nuup illoqarfiata qiterpasissuani Tuujummi sanaartorneqassapput (Ceresvej). Kommuneqarfik Sermersooq sanaartortitsisuuvoq, Clement og Carlsen Arkitekter pingaarnertut siunnersortaallutik Inuplanilu siunnersuisutut aamma sullissisuulluni.
Inissiat tamanit inissiarineqarsinnaasut U-mik iluseqassapput, taamaalilluni inissiat immikkut kaajaluisaqalissapput, inissiallu marlunnik initalinniit tallimanut initalinnut angitigissallutik.
- Sanaartorneq illoqarfitta qeqqanut kusassaataassaaq. Tamatuma saniatigut pitsaasumik sanaartorneqassapput, allaat ukiut 50-it qaangiuppata suli inigiuminassallutik, borgmester Asii Chemnitz Narup (IA) taama oqarpoq.
Tuujummi marlunnik blokkiliornissaq, pingajuallu kingusinnerusukkut aatsaat sanaartulerlugu, Kommunip pilersaarutigisimagaluarpaa. Blokkilli pingasut ataatsikkut sanaartornerisigut kommunip 33 millionit koruuninik sipaaruteqarsinnaanini paasisimavaa, Kommuneqarfik Sermersooq nalunaarpoq.
Sanaartorneq isumaqatigiissutigineqartoq 230 millionit koruunit missaannik naleqassaaq.