SANA juullerpalaalersoq
Nuummi Dronning Ingridip napparsimavissuani iggavimmiunut una qaammat naliginnaasumik ulapaarfiuneruvoq.
Maanimi juulli qaammatisiutini allassimaannanngilaq. Nerisassat sassaalliutigineqannginnerini nerisassiarineqaqqaassapput, akoorneqassapput, qalaartinneqarlutillu iffiorneqaqqaassallutik.
KNR-ip SANA tallimanngornermi ullaakkut pulaarpaa, naqittagaq juullisunnitsoq iffiorneqalereerpoq, punnersunnialaaq, iffiukkanut akuutissarsunnialaaq sukkorsunnialaarlu iggavimmi tikki naasassaapput.
Maskiinarpalaaq, kaagiliorfiup saattup attuussaappalunneri tusarsaapput. Iggavimmi sulisut igat kissarsuutillu akornanni sungiussisimallutik ulappupput, taakkuuppummi inunnik 200-nut sinnilinnut ullormut pingasoriarlutik ullut tamaasa nerisassiortartut.
SANA-p iggaviani sulisut ulapillutik sulineq sungiutiinnarsimavaat. Decembarimili piareersaatit amerlanerusarput. Juullimi ukiortaamilu nerisassat allattorsimaffiat piareersarneqassapput. Atortussat piffissaalluarnerani suliarineqassapput, uninngasullu mamartualuit ussigassaat piareersarneqassallutik. Kaagiaqqat siulliit decembarip aallartinneraniilli suliarineqalereertarput.
Sassaalliutissat naqqaniit suliarineqartarneri piffissamik aamma atuiffiungaatsiartarnerat pissutaaqataasoq Heidi S. Karlsen SANA-p iggaviani aqutsisoq oqaluttuarpoq.
- Maani qamani ikiortigut pikkorissorsuit naqqaninngaanniit suliarisarpaat taava pinngortitaminngaanniit qamunga, qamanngaanniit igamut – taamatut suleriaaseqarpugut.
- Sumiluunniit arlaanninngaanniit allaanerujussuuvugut uagut naqqaninngaaneertaratta. Soorlu Rigshospitalimi igaffii misissorlugit takusinnaasarpakka avataaninngaanniit naammassereerlugit atortaraat, taanna oqarpoq.
Nunatta sineriaaniit mattammik, tuttup, umimmaap savallu neqaannik kujataaneersunik SANA-mi iggavimmiut piseriarlutik poortorlugillu qeritittarpaat, taakkulu juullip qaammataani piareersaatit siulliit ilagisarpaat. Juullisiornissamullu piareertarput.
Nunatta pissarititaanik atuineq Heidi S. Karlsenimut tassaaginnanngilaq ileqqumik nerisassanillu mamartunik attassinneq, akisussaaqataaneruvorli. Nerisassiassat atortussiassallu Danmarkimiit pisiarinngikkaluarlugit, nunatta pissarititaanik neqinik iggavimmiut pisinerminni piniartunik namminersortunillu tapersersuisarput.
- Nalliuttuni ulluinnarnilu sapinngisamik nerisassat kalaaliminiutinniarsarisarpagut. Danmarkimut bestiilertakkagut maannakkut ikilisiartorpagut, soorlu nersussuit taava umimmaat tuttut atortorujussuuakka.
Kalaaliminernilli atuineq isumaqarneruvoq. Napparsimmavimmimi juullikkunni uninngagaanni nerisassat sassaalliutigineqartut ilisarnarluarput. Kalaalimerngit mamarluartut ilisarnartut napparsimalluni iluarusuutigineqarsinnaasut.
Ilaquttat angerlarsimaffimmi ilagalugit juullisiorneq inuit arlallit nalliussisarpaat, napparsimmavimmili juullip ulluini uninngasunut SANA-p iggaviani sulisut juullisiortitsinissaq aamma suliassaraat.
Torsuusani Santa Luciarpalaaq
Napparsimmaviup igaffissuani juullernissamut kisiat piareersaaffigineqarneq ajorpaat.
SANA-mimi sulisut uninngasullu torsuusani iikkanut tulallutik tarrajuttumi qilanaarlutik nipaalluinnarlutillu tallimanngornermi ullaajugaa utaqqipput.
Nuummi Internationale Friskolemi 3.klassemi atuartut napparsimmavimmi ukiumoortumik Santa Luciarnissaminnut inimi ungasinngitsumi piareersarput. Atisat ukiorsiutit, kjolinik qaqortunik niaqorutinillu qillersunik taarserneqarput meeqqallu naneruutinik tigummiaalerneqarlutik. Meeqqat tunuleriiaatsinneqarput ilitsersuutillu matup ammannginnerani tusartinneqarput.
Tamatuma kingunitsianngua Santa Luciarpalaaq tusarsaalerpoq naneruutillu qaamarngi qillalaartut takussaalerput, meeqqat torsuusakkut takisuumik sangujoraarlutik ingerlaarput.
SANA-mi immikkoortortaqarfiit arlallit ukiut tamaasa Santa Luciartunik pulaarneqarusuttaraluarput, ingerlaarfigineqartartorli salliutinneqartariaqarpoq. Taamaanngippat aqqutigisaq takivallaalissaaq.
Meeqqat ingerlaareerlutik sanioqquteqqikkamik siullermit nipikinnerulersimapput alloriartarnerilu ataqatigiikkunnaarsimallutik. SANA-mmi torsuusaani ingerlaartilluni naligiimmik alloraqatigiinnissaq ajornaatsuinnaanngilaq. Pingaartumik naammassinermi nalunagu Heidi S. Karlsenip iggavianit lucia poorlunik saftimillu sassaallerfigineqartussaalluni.
Ataatsimoorluni ullormik aallartitsineq
Santa Luciartut torsuusakkut kigaatsumik ingerlaarput nipaarukkiartorlutillu. SANA-milu ulloq nalinginnaasoq aallarteqqinneqassaaq. Taamaakkaluartoq nakorsartittunut immikkoortortaqarfimmi erinarsoqatigiinneq ataatsimoornerlu ulluni immikkuullarissuni kisimi pingaartinneqanngillat.
Ukiormi kaajallallugu ullut tamaasa ullaakkut erinarsoqatigiittoqartarpoq. Ullumikkut ulloq aamma taamaappoq. Juullimi pinnersaatit nujarmiuliullugit sulisunut uningasunullu juullisiutinik erinarsortoqarpoq. Erinarsoqatigiit appissimatsiaannartut ininit matut ammarneqallattaalerput uninngasullu niaqqutik nuisilaarlugit alapernaalerlutik.
Ullaakkut erinarsoqatigiinneq ukiuni arlalinni ileqquusoq, nakorsartittunut immikkoortortaqarfimmi peqqissaasuuneq Anne Birgitte Jensen oqaluttuarpoq.
- Ukiorpassuarni kingullerni ullaakkut erinarsoqatigittarpugut. Tamanna Sisimiunit ilikkarsimavarput. Erinarsoqatigiittarpugut taamaalilluta aamma uninngasut erinarsoqataanissaannik periarfissittarpagut. Ilaannikkut ilai peqataasarput ilaalu aamma peqataaneq ajorlutik. Uninngasulli matutik ammarlugit tusarnaartut amerlanertigut takusarpagut, taanna oqarpoq.
Anne Birgitte Jensenip oqarnera naapertorlugu, uninngasut sulisullu ullaakkut erinarsoqatigeereernerup kingorna nuannaarnerulertarput, erinarsoqatigiinnerullu nuannaarnerulersittaraatigut ilanngullugu oqaatigaa.
Nakorsartittunut immikkoortortaqarfimmi ulapaartoqaraluaraangalluunniit piffissaqarnermi ullaakkut erinarsoqatigiinnissaq salliunneqartarpoq. Ulapputigisat assigiinngitsut qimalaarlugit sulisut uninngasullu ullormik aallartitseqatigiinnissaat pingaartinneqartarpoq.
Naak napparsimmavimmi uninngasut sulisullu angerlarsimaffitsik ilaquttatillu ungasillugit juulli nalliussisariaqaraluaraat, SANA-p iggaviani, torsuusani immikkoortortanilu juullip tipaatsunnartua misigineqarsinnaavoq. Nalaatsornerinnaanngilarlu juullip inuata napparsimmaviup eqqaanut ukiut tamaasa mittarnera.
