KANGILINNGUIT Saliinissaq pillugu isumaqatigiinniarnerit uninngasut
Danskit sakkutooqarfigisimasaanni Kangilinnguani saliinissaq pillugu isumaqatigiinniarnerit unittooqqapput.
Namminersornermut, Pinngortitamut, Avatangiisinut Nunaateqarnermullu Naalakkersuisoqarfik KNR-imut taama ilisimatitsivoq.
Danskit illersornissamut ministeriat Peter Christensen Kangilinnguani avatangiisinik saliinissap suliarimannittussarsiuuteqqinnissaanik januaarimi nalunaaruteqarmat saammaateqatigiinnissaq ilimanarsigaluarpoq.
Aamma atuaruk KANGILINNGUIT Aleqap nutaamik suliariumannittussarsiuussisoqarnissaa iluarisimaarpaa
Suliariumannittussarsiuuteqqaarnerata isornartorsiorneqarnerata, peqatigisaanik taamaatiinnarneqartup, kingorna tamanna pivoq.
Namminersorlutik Oqartussanit piumasaqaateqartoqarneratigut Nunatsinni avatangiisit pillugit inatsisiliorneq tunngavigalugu suliariumannittussarsiuusseqqittoqarnissaa siunniunneqartoq, illersornissamut ministerip taamani oqaatigaa.
Issittoq pillugu misissueqqissaarisoqarnera pissutigalugu isumaqatigiinniartoqarunnaarallartoq
Maannali - qaammatit qulit ingerlareersut - Namminersornermut, Pinngortitamut, Avatangiisinut Nunaateqarnermullu Naalakkersuisoqarfik aamma Illersornissamik ministereqarfik suliariumannittussarsiuussinermi malittarisassat pillugit suli isumaqatigiissuteqarsimanngillat.
Naalakkersuisoqarfimmi pisortaq naapertorlugu Illersornissamut ministereqarfimmi atorfilittat aggustip qulingani isumaqatigiinniarnissamut juulip naalernerani qaaqquneqarput, piffissamilu tassani isumaqatigiissutissamut missingiut piareerneqareersimavoq.
Illersornissamulli ministereqarfiup aaqqissugaanerani allannguinerit danskillu naalakkersuisuisa Issittoq pillugu misissueqqissaarinissaat pillugu oqaloqatigiinnerit pissutigalugit ataatsimiinnissaq taamaatiinnarneqarpoq, naalakkersuisoqarfik taama ilisimatitsivoq.
Aamma atuaruk KANGILINNGUIT Illuutinik piiaasoqanngippat saliinissaq ajornakusuussasoq
Naalakkersuisoqarfik: Mingutsitsineq iliuuseqarfigineqassaaq
Isumaqatigiinniarnissallu pillugit akeqqusisoqartaraluartoq Illersornissamut ministereqarfimmit uterfigineqarsimanngillat. Tamannalu naalakkersuisoqarfimmi ernumartoqartinneqartupilussuuvoq:
- Isumaqatigiinniarnerit maannakkorpiaq ajoraluartumik uninngapput, tamannalu isornarpoq, politikkikkummi sukkanerpaamik isumaqatigiissuteqartoqartariaqarpoq sumiiffimmi mingutsitsinerup iliuuseqarfiginissaanut Illersornissamut ministereqarfiup saliinissaa qulakkeerneqaqqullugu, naalakkersuisoqarfimmi pisortaq Mette Skarregaard KNR-imut taama oqarpoq.
Illersornissamut ministereqarfiup Illuutinut aqutsisoqarfiata, suliariumannittussarsiuussinermik ingerlatsisussap, KNR-imut e-mailikkut ilisimatsitsissutigaa Kangilinnguani avatangiisinik saliinissaq danskit illersornissamut qullersaqarfiata suli aalajangiusimagaa.
Taamaattorli "issittumi misissueqqissaarinerup piviusiunngortinnissaanut aalajangiisoqarnissaa Illersornissamut ministereqarfiup maannakkorpiaq utaqqimaarpaa", aqutsisoqarfik taama allappoq.
