KANGILINNGUIT Aleqap nutaamik suliariumannittussarsiuussisoqarnissaa iluarisimaarpaa

Kangilinnguit pillugit nutaamik suliariumannittussarsiuussinissaq piffimmi nutaanik periarfissiivoq.
Aleqa Hammond (S) & Aaja Chemnitz Larsen (IA) Assi © : IA Folketingimi
januaarip 29-at 2016 11:46

Illersornissamut ministerip Peter Christensenip ippassaq isumasioqatigiinnermi Kangilinnguani nutaamik suliariumannittussarsiuussisoqarnissaa erseqqissaatigereeraa, Folketingimut ilaasortaq Aleqa Hammond taama isumaqarpoq.

Illersornissaqarfik Kangilinnguani illuutit ilaasa pisiumasinnaasumut tunniussinnaaneranut ammaffiginnittoq – taamaattoq tamanna neqeroorutip sukumiisup nalilerneqarnera allaavigalugu pissasoq, ministerip isumasioqatigiinnermi oqaatigaa.

Aamma atuaruk Suliariumannittussarsiuusseqqinnermi illut isaterneqarnissaat ilaavoq

Tamannalu Illersornissaqarfiup piffimmi mingutsitsinermik piiaanissamut pisussaaffimminik suli naammassinninnera peqatigalu pissaaq.

Tamannalu Aleqa Hammondip nuannaarutigaa:

- Kalaallit inuiaqatigiit illuutinik tigusinissamik soqutiginnissappata, maanna Illersornissamut ministerip avatangiisinik saliinissap inuiannit kalaallinit isumagisassanngortinneqarnissaanik isuma qimappaa.

- Tamannami aallaqqaammulli piusorsiortuusimanngilluinnarpoq. Mingutsitsisut soorunami avatangiisinik saliinissaq akilissavaat. Tamanna assortorneqarsinnaanngilaq.

Illersornissamullu ministerip tullianik suliariumannittussarsiornissaq ataatsimut suliariumannittussarsiornertut ingerlanneqarumaartoq erseqqissaatigaa, tassanilu manna tikillugu pilersaarutigineqareersutut, Kangilinnguani mingutsitsinermik saliineq illuutinillu piiaaneq suliassaassapput.

Aamma atuaruk Kangilinnguit suliariumannittussarsiuunneqaqqinnissaa kalaallit europallu inatsisaannik tunuliaqutaqassaaq

Aamma atuaruk Kangilinnguit pillugit suliariumannittussarsiuussineq taamaatiinnarneqarpoq

Tamannalu Aleqa Hammondimik aarlerilersitsinngilaq.

- Tunngaviusussussaajumaartut suli takunngilagut. Atagu nutaamik suliariumannittussarsiuussinissamut atatillugu tunngaviusussat nutaat qanoq isikkoqarnersut takoqqaalaarallartigu. Taava isummerumaassaagut. Mannalu tikillugu siusinnerusumut sanilliullugu illersornissamut ministerip aaqqiissutissatut takorluukkat assigiinngitsut eqqarsaatersuutigigai isumaqarpunga. 

Namminersorlutik Oqartussat Illersornissaqarfiullu avatangiisunut saliinissamut sinaakkutaasussaq suli isumaqatiginninniutigaat.