KANGILINNGUIT Suliariumannittussarsiuusseqqinnermi illut isaterneqarnissaat ilaavoq
Kangilinnguit siunissaa pillugu Folketingemi isumasioqatigiittoqarmat Illersornissamut ministeri taama nassuiaavoq.
- Isumasioqatigiinnermi tusaraluarlugu Kangilinnguani illut amerlasuunit soqutigineqartut, tamannalu saaffiginnissutigineqarnikuunngimmat avatangiisinik saliinissaq illunillu isaterinissaq ataatsimoortillugit suliariumannittussarsiuutissavagut. Taamaattumik Kangilinnguani illunik Kalaallit Nunaannit soqutiginnittut piaartumik saaffiginneqqussavakka, saaffiginnittoqanngippammi allanngortoqarunnanngilaq, Illersornissamut ministeri Peter Christensen KNR-imut oqarpoq.
Aamma atuaruk Kangilinnguit suliariumannittussarsiuunneqaqqinnissaa kalaallit europallu inatsisaannik tunuliaqutaqassaaq
Aamma atuaruk Illersornissamut ministeri Kangilinnguit pillugit isumasiorneqalersoq
Illut pillugit saaffiginnittoqarnikuunngilaq
Ukiuni kingullerni ilaatigut illussanik titartaasartup Peter Barfoedip kattuffiullu Schweizimeersup 3HF-ip tusagasiutitigoorlutik Kangilinnguani illut isaterneqannginnissaat Illersornissaqarfiullu nammineq avatangiisinik saliinissaq isumagissagaa siunnersuutigisarsimavaat.
Isumasioqatigiinnermi Aleqa Hammondip oqaatigaa Kangilinnguani illut isaterneqannginnissaat 'kalaallit innutaannit soqutigineqartoq'.
Kangilinnguanili illut ataannartinniarlugit ataasinnguamilluunniit Illersornissaqarfimmut saaffiginnittoqarnikuunngilaq. Nutaarsiassatiguinnaq tamanna innersuussutigineqarnikuuvoq.
’Illersornissaqarfimmi pigisanik aqutsisut nalilerpaat illut aalajangersimasut tunineqarnissaat siunertaralugit napatiinnarneqarsinnaasut’, Illersornissamut ministeri isumasioqatigiinnermi oqarpoq. Saaffiginnissuteqarnermiilli tamanna pissasoq erseqqissarlugu.
Illullu isaterneqassanngippata Danmarkip saliinissaminik akisussaaffiminik sumiginnaasinnaavoq, Peter Christensen oqarpoq.
- Ilisimaneqartariaqarpoq Namminersorlutik Oqartussanit saliinissatsinnik piumasaqaatigineqartut anguniarsarigigut. Illullu minissagutsigit iluamik saliisinnaanngilagut, mingutsitsinerummi ilaa illut ataaniissinnaammat, Peter Christensen KNR-imut oqarpoq.
