KANGILINNGUIT Kangilinnguit suliariumannittussarsiuunneqaqqinnissaa kalaallit europallu inatsisaannik tunuliaqutaqassaaq
Illersornissaqarfiup Kangilinnguani suliariumannittussarsiuussineq maanna ingerlanneqaraluartoq pingasunngormat unitsippaa. Tamanna pivoq, suliariummannittussarsiuussineq danskit inatsissaannik tunngaveqarsimammat kalaallit inatsisaannik tunngaveqarnanani.
Sooq inatsisitigut tunngavissat qularineqarpata suliariumannittussarsiuussisoqarsimava?
- Danskit naalakkersuisorisimasaasa naalakkersuisuuneranni suliakkiutigineqarsimavoq. Paasivarali inerniliisoqarmat isumaqartoqarsimasoq kalaallit inatsisaat atorneqassasut. Tamannalu isumaqarpoq suliariumannittussarsiortoqaqqissasoq, Illersornissamut ministeri Peter Christensen isumasioqatigiittoqaqqammersorlu KNR-imut oqarpoq.
Aamma atuaruk Kangilinnguit pillugit suliariumannittussarsiuussineq taamaatiinnarneqarpoq
Aamma atuaruk Siulittaasoq: Kangilinnguani illuutit Namminersorlutik Oqartussat nammineerlutik akilertariaqassavaat
Suliffeqarfiit tallimat suliariumannittussarsiuussinermut suliariumannissinnaasutut akuerineqareersimapput, Kangilinnguani avatangiisit salinneqarnissaat illullu ingutserneqarnissaannik suliariumannittussarsiuussisoqarpoq. Februaarillu aallaqqaataat killigitinneqaraluarluni.
Maannali nutaamik suliariumannittussarsiuussisoqassaaq, tunngavissallu suliarineri ukiup ataatsip missaanik sivisussuseqassasut naatsorsuutigineqarput. Kangilinnguilli salinneqarnissaa kingusinnerpaamik 2017-imi aasakkut aallartissinnaassasoq Illersornissaqarfiup naatsorsuutigaat.
Suliariumannittussarsiuussinissaq tulleq EU-mi malittarisassanik tunngaveqassaaq
Suliariumannittussarsiuussinissap tullia kalaallit malittarisassaannik tunngaveqaraluartoq suliariumannittussarsiuussineq EU-mut aamma ingerlateqqinneqassaaq.
- Suliariumannittussarsiuussinissaq allanngortinneqaraluartoq anguniagaq allanngunngilaq. Tassa Kangilinnguit salinneqarnissaa qanoq akeqassanersoq, EU-mi suliariumannittussarsiuussinikkut, paasinissaa, Peter Christensen KNR-imut oqarpoq.
Aamma atuaruk Suliariumannittussarsiuussinissamut Kalaallit Nunaat aalajangiissaaq
Kisiannimi oqarputit suliariumannittussarsiuussinermut kalaallit inatsisaat tunngaviussasut. Kalaallit Nunaallu EU-mut ilaasortaanngilaq. Qanoq tamanna issava suliariumannittussarsiuussineq kalaallit inatsisaannik tunngaveqarpat EU-mullu suliariumannittussarsiornerussappat?
- Tassa saliinermi piumasaaqaataasussanut tamanna tunngavoq. Danmark suliakkiisussaavoq akiliisussaallunilu. Tassa EU-p suliariumannittussarsiuussinermut malittarisassai malippavut.
- Malittarisassaanerili kisimik pillugu malinngilarput. Kisiannili Europamit akinik pigutta aningaasanik sipaarnerussagatta, Illersornissamut ministeri KNR-imut oqarpoq.
Illersornissamut ataatsimiititaliami isumasioqatigiinnq tamaat uani takusinnaavat:
