Politikki Inuussutissarsiutit

KANGILINNGUIT Kangilinnguit pillugit suliariumannittussarsiuussineq taamaatiinnarneqarpoq

Kangilinnguit pillugit suliariumannittussarsiuussineq februaarip aallaqqaataanut killeqartoq Illersornissaqarfiup taamaatiinnarpaa. Suliariumannittussarsiuussineq inatsimmik kukkusumik tunngaveqarluni ingerlanneqarnera tamatumunnga pissutaavoq.

Allattoq Helle Nørrelund Sørensen

januaarip 28-at 2016 06:48

Nutserisoq Kerté Jeremiassen

Kangilinnguani bulldozerersuit maskinallu allat, illunik atortukunillu allanik, maajip aallaqqaataa tikitsinnagu ingutserilernavianngillat, Illersornissaqarfiup suliariumannittussarsiuussineranut piumasaqaataat taamaalilluni malinneqarnavianngilaq.

Illersornissaqarfimmiimmi pigisanik aqutsisut, Kangilinnguit 2014-imi qimanneraniit, saliinissamut suliarititsinissamut tunngasut atorunnaarallartissimavai. Taama Illersornissamut ministeri, Peter Christensen Folketingep, Illersornissamut ataatsimiititaliaanut allagaqarpoq.

Aamma atuaruk Illersornissamut ministeri Kangilinnguit pillugit isumasiorneqalersoq

Saleerusussinnaasut februarip aallaqqaataani qinnuteqarnissaminnut piffissalerneqaraluarput. Tamannalu tassa unitsinneqarallarpoq.

Unitsitsiinnarnermut patsisaasoq tassaavoq, suliarititsinissaq inatsisitigut kukkusumik tunngaveqarsimammat, Illersornissamut ministeri, Peter Christensen taama nalunaarpoq.

- Kalaallit Nunaata inatsisaat toqqammavigineqarnissaat uani isiginiarneqarpoq, aallaqqaammullu suliarititsinissami danskit inatsisaat toqqammaviginagit, Illersornissamut ministeri, allappoq.

Aamma atuaruk Siulittaasoq: Kangilinnguani illuutit Namminersorlutik Oqartussat nammineerlutik akilertariaqassavaat

Tamannalu qularnanngitsumik isumaqarpoq, suliarititsineq minnerpaamik ukiumik ataatsimik kinguartinneqassasoq.

- Taamatut piffissamik allannguineq isumaqarpoq piffissaliunneqaraluartup atuutiinnarnissaa ingerlanneqarsinnaajunnaarmat. Taamaattumik suliariumannittussarsiuussinissamut malittarisassat najoqqutaralugit sulisussat 2016-imi aallartissinnaanavianngillat. Taamaattumik Illersornissaqarfimmiit suliariumannittussarsiuussinissaq taamaatinneqassasoq, Illersornissamut ministeri, allappoq.

Suliarititsinissap taamaatinneqarnera Illersornissaqarfiup, Namminersorlutik Oqartussat Kommuneqarfik Sermersuullu Kangilinnguani saliinissap politikkikkut isumaqatigiinniassutiginerata nalaani pivoq.

Illersornissamut ministeri, Peter Christensen Folketingep, Illersornissamut ataatsimiititaliaanut isumasioqatigiinnissamut ullumi aamma qaaqquneqarsimavoq.

Ministerip taamaatitsinermik nalunaarutaa uani atuarsinnaavat.