KANGILINNGUIT Illuutinik piiaasoqanngippat saliinissaq ajornakusuussasoq
Illersornissamut ministereqarfiup Illuutinut aqutsisoqarfiata suliamik misissueernerata kingorna, Illersornissamut ministereqarfik taama inerniliivoq. Atuagassiaq Ingeniøren ullumi taama allaaserisaqarpoq.
Tankit uuliaasiviit ukiorpassuarni atorneqarsimanerisa kingunerisaanik nunamik imermillu nunap iluaniittumik annertuumik mingutsitsisoqarsimanera sakkutooqarfiusimasumi avatangiisinik misissuinerni paasineqarpoq. Sumiiffillu salinneqanngippat mingutsitsineq Arsuup Kangerluanut siaruaassinnaavoq.
Taamaammat avatangiisinik saliineq naammassineqassappat tankit uuliaasiviit illuutillu ilaat peerneqartariaqarput.
Illuutigineqartullu sinneri aserfallatsaaliorneqanngikkunik aserfallakkiartuinnassapput, aamma ruujorit uuliamut atorneqarsimasut tamakkerlugit imaarneqarsinnaanissaat salinneqarsinnaanissaallu qulakkeeruminaassasoq, illersornissamut ministeri Peter Christensen, Ingeniøren naapertorlugu, Folketingip illersornissamut ataatsimiititaliaanut taama allappoq.
Illersornissamut ministereqarfiup Nunatsinnilu naalakkersuisut Kangilinnguit qimavissorneqassanersut suli eqqartorpaat.
Aamma atuaruk Avatangiisit mingutsinneqarsimanerat Aajap ajuusaarutigaa
Aamma atuaruk Aleqap nutaamik suliariumannittussarsiuussisoqarnissaa iluarisimaarpaa
Sakkutooqarfiusimasulli tamakkiisumik piiarneqarnissaa Naalakkersuisut aalajangiusimavaat. Naalakkersuisut siulittaasuat Kim Kielsen taama ilisimatitsivoq.
- Sakkutooqarfiusimasup atornissaa sumiiffimmilu avatangiisitigut saliinissamik pisussaaffigineqartut tigunissaat arlaannit kissaatigineqanngippat, taava Illersornissaqarfik avatangiisinik pitsaasumik saliisariaqarpoq. Tamatumanilu illuutinik allanillu piiaanissamik pisariaqartitsiffiussappat Naalakkersuisut tamatumunnga akerliunavianngillat, Kielsen atugassiamut Ingeniørenimut mailikkut taama allappoq.
Folketingimut ilaasortaq Inuit Ataqatigiinneersoq Aaja Chemnitz Larsen aamma taama isumaqarpoq.
- Illersornissaqarfiup avatangiisinik tamakkiisumik saliinissaa IA-mut pingaarnerpaavoq, Aaja Chemnitz Larsen atugassiamut taama oqarpoq.