Nunatsinni illersornissamut politikkimi nutaaliorneq: Sakkutuuliinerunissaq pillugu partiit isumaqatigiittut

Qullermut Atassummullu KNR-mit saaffiginnissuteqareeraluarluta suli uterfigineqanngilagut. Taamaammat allaatigisami peqataatinneqanngillat.

Issittoq ukiuni qulikkuutaani sakkulersuuffiunngitsuusorineqartarnikuuvoq. Nunarsuarmili politikkikkut ineriartornerup, Ruslandip Kinap USA-llu tamarmik immikkut aqutsisuunerareernerisa kingorna sakkuaaffiunnginnera aarlerinaateqalersippaa.

Sapaatip akunnerini kingullerni pissanganartorsiorfioqisuni, illersornissamut politikkip inatsisartuni partiit qanoq isumaqarfigineraat ilisimasaqarfiginerulerusullugit, KNR partiit torsuusaanni pulaaqattaarpoq.

Issittup sakkulersuuffiunnginnerata aarlerinaateqalernera sakkutuuliinissarlu pisariaqalersinnaasoq pillugu eqqarsaatersuutaanera, KNR-imit oqaloqatigineqartut partiit amerlanerit isumaqataaffigaat.

- Nunatta eqqissisimasuunissaa upperisariaqarparput, tamannalu attatiinnarneqassappat sakkutuulersuisariaqarpugut suleqateqartariaqarlutalu. Saassussinata immitsinnulli illersorsinnaajumalluta, Siumut siulittaasuata tullia nunanut allanut aamma naalagaaffinngornissamut naalakkersuisuugallartoq Vivian Motzfeldt oqarpoq.

Sakkutuulersuinissaq Inuit Ataqatigiit (IA) akerleriuaannarnikuuaat, maannamulli ineriartorneq eqqarsaatigalugu sammivimmik allannguinissaq pisariaqalersinnaasoq partiip nassuerutigaa.

Taama ilaatigut aatsitassanut aamma inatsisit atuutsinneqarnerannut naalakkersuisuugallartoq Naaja Nathanielsen oqarpoq.

- Issittup sakkulersuuffiunnginnera maligassaalluartuuvoq, tamannali ajunngitsussaq pillugu qimattariaqarnera ajuusaarutigaarput. Piviusormi allanngorpoq, amerikap illersornerunissaminnut kissataat akuerissagutsigu nunatsinni sakkutuulersulernissaq avaqqussinnaanavianngilarput, taanna oqarpoq.

Illersornissamulli politikki pillugu isumaqatigiinnermut, partiit naalakkersuisuutitaqartut marluk akornanni – IA aamma Siumut – kisimiinngillat.

- Issittup sakkulersuuffiunnginnera pillugu isuma upperiatsajaneruvoq. Nunatta inissisimanera pillugu nunarsuarmilu nalorninartoqarfiusumi inuusugut, arlaleriarluta oqaatigisareernikuuarput. Takorluuisuusiinnarsinnaanngilagut oqarlutalu nunatsinni paassat aqerlullu atorneqassanngitsut, Demokraatit siulittaasuat Jens-Frederik Nielsen oqarpoq.

Illersornissaqarfiup umiarsui alapernaarsuutit pisoqalipput ukiunilu kingullerni arlaleriarlutik ajutooqattaarput. Taarsersorneqarnissaat maanna pilersaarutaavoq. Assi © : Mads Malik Fuglsang Holm/ KNR

Illersornissamut isumaqatigiissut tapersersorneqangaatsiartoq

Issittoq pillugu illersornissamut isumaqatigiissut, Vivian Motzfeldt qallunaat illersornissamut ministeriat Troels Lund Poulsen (V) peqatigalugu sapaatit akunneri arlaqanngitsut qaangiupput saqqummiummassuk.

Kalaallit inuiaat danmarkimi illersornissamut ilanngutivinneqarnissaat pisariaqarluinnartoq isumaqatigiissut atuaraanni ersarippoq. Nunarput taamaalluni namminiilivissagaluarpat, innuttaasa piginnaasanik pisariaqartunik pigiliussisimanissaannik tamanna qularnaarisuussaaq.

- Piginnittussaanermut tunngasuni nunatsinni innuttaasut oqartussaassuseqarnissaat kissaatigaarput. Kangerlussuarmi Upalungaarsimanermik ilinniarfik siunissami inuit piginnaasanik pigiliussinissaannut ilinniarfissatut assersuutaalluarsinnaasoq isumaqarpunga, Siumumi ataqatigiissaarinermi siulittaasup tullia Hans Peter Poulsen oqarpoq.

Illersornissaq pillugu isumaqatigiissummi siunniunneqartut 15 milliartingajalluinnaat Demokraatinit aamma tapersersorneqarput.

- Issittumi illersornissamut innuttaasunik sakkutuunillu atorfissaqartitsineruleqqavugut. Illersornissaq pillugu atorfissaqartinneqartunut tamanut sullissinermik innuttaasutta peqataaffigisinnaasaattut periarfissaalluarpoq. Ineriartornissatsinnut periarfissaqarluarpugut, Jens-Frederik Nielsen oqarpoq.

IA-mit assingusumik oqariartuuteqartoqarpoq.

- Sakkutooqarnera kalaallinut inuiaqatigiinnut iluaqutaasussaassasoq paasisinnaavarput. Illersornissaqarnerunerinnaananilu nakkutilliinerunerinnaanngitsoq kisianni aamma inuussutissarsiornikkut soorlu aningaasaqarnikkut suliffissaqartitsinikkullu iluaqutaassaaq, Naaja Nathanielsen oqarpoq.

Naleraq illersornissaq pillugu isumaqatigiissut nutaamit ilaajunnaarusuttoq

Naleraq IA-lu naalakkersuisooqatigiilermatali ukiut sisamanngungajalerput, isumaqatigiissutaannilu “nunarput sakkulersorfiussanngitsoq” nalunaaruteqarnikuupput.

IA-p isuma tamanna qimassimagaa Naleqqalli suli attakkaa ersarissivoq.

Taamaammat naalakkersuisut qallunaat naalagaaffiannik illersornissaq pillugu isumaqatigiissummut nutaamut isumaqatigiissuteqarnikut, inatsisartuni partiit allat arlallit paarlattuanik Naleqqap siulittaasua isumaqataanngilaq.

- Isumaqatigiissummi taamaattumi peqataarusunngilluinnarpunga. Qallunaat sakkutooqarnerannut ilaalersitsineruvoq. Kingusinnerusukkut uagut nammineq tigusinnaanngornissaanut ineriartortitsinerunnginnami, Pele Broberg oqarpoq.

Naleraq IA-lu naalakkersuisooqatigiinnerini Pele Broberg nunanut allanut naalakkersuisuusimavoq. Taamanikkut aamma qallunaat nunatsinni qallunaat illersornissaqarfiat pillugu isornartorsiunikuuvoq. Assi © : Ólafur Steinar Rye Gestsson/Ritzau Scanpix

Illersornissaq pillugu isumaqatigiissummit tapersiineq 11. Marsi qinersisoqareerpat Naleqqap tunuartissinnaanngussaguniuk taamaaliorniartoq, Pele Broberg neriorsuivoq.

Nunatta illersornissaanik pisinnaatitsilertumik USA-lu illersornissaq pillugu isumaqatigiissusiortariaqartoq Naleqqap kissaatigaa.