Issittumi Tunngaviusumik ilinniarfimmi piumaneqarluartumi ilinniarfissat amerlanerulersut
Issittumi Tunngaviusumik ilinniarfik pisortatigoortumik sapaatiummat ammarmat nunatsinnit tamarmit inuusuttut 22-t sakkutuut Kangerlussuarmi illorsuanut qorsummik qalipaatilimmut nuupput.
Taakku Kangerlussuarmi nunanut allanut tunngasunut namminiilivinnissamullu naalakkersuisumit, Vivian Motzfeldimit ilaatigut oqalugiarfigineqarput, nunaqarfimmilu innuttaasunut kaffillertoqarluni.
Issittumi Tunngaviusumik ilinniarfik Illersornissaqarfiup nunatsinni ilinniarfianni siulliuvoq – taannalu suliluunniit ammanngitsoq soqutiginnittorpassuaqalereerpoq. Inuusuttut 26-t ilinniartunut inissanut 22-nut qinnuteqarput.
Soqutiginninnerup annertunera pissutigalugu ilinniartunut inissat ukiup tullianit 30-nut amerlineqassapput.
- Inissaqartitsinerup annertunissaanik pilersaalereerpugut, taamaammat ukiup tulliani ilinniartut ukiumut 30-t allartittarsinnaapput, danskit illersornissamut ministeriat, Troels Lund Poulsen tusagassiuutinut nalunaarummi allappoq.
Isumalluutit amerlanerunissaat pisariaqartoq
Issittumi Tunngaviusumik ilinniagaq inuusuttunut 18-init 25-nut ukiulinnut ilinniarfiuvoq, tassani ikiueqqaarneq, sakkutuutut piginnaassuseqarneq, ikuallattumik qamisaaneq umiarsuarmiinnerlu ilaatigut ilinniarneqassapput.
Piginnaasallu taakku pisariaqartikkigut, folketingimut ilaasortaq, IA-meersoq, Aaja Chemnitz isumaqarpoq, taassuma ilinniarfeqalernissaa isumaqatigiinniaqataaffigaa.
Taamaammat ukiup tullianit ilinniarnissamut inissat marloriaammik amerlanerusariaqartut – tassa 42-sariaqartut isumaqarpoq.
- Nunatta ilinniartut ilinniarnissaat pisariaqartippai, Illersornissaqarfillu tassunga tapiissuteqarnerusariaqarpoq, tamannali amerlaneurusut ilinniakkamik allamik assersuutigalugu politiinut ilinniarnermut ingerlaqqinnissaannut aamma tapersiissammat, taanna KNR-imut allappoq.
Issittumi Tunngaviusumik Ilinniarfimmi pisortap, Simon Kokfeltip qinikkat qanoq isumaqatigiissuteqarnissaat pissangagaa. Taassumali ilinniartut amerlanerunerat isumalluutit amerlanerunissaannik isumaqartoq erseqqissaatigaa.
- Maannakkutut itsillugit inissaqartitsinerput atorparput. Imaassinnaavoq ilinniartunut amerlanerusunut inissiffanik nassaarnissaq ajornaatsuusoq. Kisianni ukiup tullianit ilinniartut amerlanerunissaat aalajangerneqassappat atortut, atisat ilinniarnermilu atortussat ilinniartoqarnerunissaanut atorneqartussat misissorneqassapput, taanna oqarpoq.
Taassuma siullertut Illersornissaqarfimmi suleqatini peqatigalugit inuusuttut 22-t sakkutuutut maanna atisalersimasut aallunniarpai.
- Issittumi Tunngaviusumik ilinniarfiup inuusuttunut killiliisuunngitsunik periarfissiinera suliffeqarnissaannullu tunngaviliisinnaanera nuannequtaavoq.
- Qanorluunniit qinigaqaraluarunik tamanna kalaallinut inuiaqatigiinnut iluaqutaanissaa ilimagaara, Simon Kokfelt oqarpoq.
Ilinniarfik 50 millionit koruuninik akeqarpoq, taannalu Danmarkimi Illersornissamut ministereqarfimmit aningaasalerneqarpoq, taannalu Issittumi Piginnaasaqalernissamut isumaqatigiissummut, naalakkersuisut danskillu naalakkersuisuisa 2022-mi maajimi atsiugaannut ilaavoq.
