Sakkutuujusimasoq nunatta avannaarsuani angalalersoq

Erik B. Jørgensen inuuniutigalugu angalatuujuvoq, ilisimasassarsiortoq. Angalasimanerminilu misigisartakkaminik saqqummersitsillunilu atuakkiortanini inuuniutigaa. Maanna nunatta avannaarsuani angalanissani siunniukkaa TV2FYN allappoq.

Erik B. Jørgensen angalaqatissanilu Jesper Granc-Petersen qaammat una Qaanaaliassapput qaammatini pingasuni ilisimasassarsiorlutik angalajartorlutik.

Angallavissaat siumut utimullu katillugu 2.500-2.800 km akornanni isorartussuseqassaaq.

Ilisimasassarsiorneq 4 mio. koruuninik nalilik

Erik B. Jørgensenip nassuiaanera naapertorlugu una ilisimasassarsiorluni angalanissaq aalajangersimasumik anguniagartaqanngilaq:

- Oqarsinnaavunga uani ilisimasassarsiorluni angalanissatsinni Knud Rasmussenip ilisimasassarsiorluni angalanerani 1916-ip 1918-illu akornanni inussuliarisimasai misissussavagut. Inussuliarisimasaata amerlanersaat sumiissusersineqareerput ilaalli suli tikinneqqaqqinngisaannarput, taamaammat taakku tikissinnaagutsigit alutornassaqaaq, Erik B. Jørgensen TV2FYN-imut oqarpoq.

Init marluullutik ilisimasassarsiorluni angalanerat katillugit 4 millionit koruuninik naleqarpoq.

Qaanaami piniartut qimmiinik 16-inik attartorlutik angalassapput. Erik B. Jørgensen qimussernermik sungiusariariartorluni decembarip qaammataani Qaanaamiippoq.

Ilisimasassarsiorluni angalanissaq Erik B. Jørgensenip nittartagaani paasisaqarfiginerusinnaavat.