Sakkutooqarnikkut pinngitsaaliilluni nunatsinnik aqutsilerneq? Naamik, naamik naamerluinnaq!

- Danskiunianngilagut. Amerikamiunianngilagut. Kalaaliorusuppugut.
Naalakkersuisut siulittaasuat, Múte B. Egede danskeq suleqatini Mette Frederiksen peqatigalugu amerikamiut præsidentissaata Kalaallit Nunaat USA-p aqulissagaa pigilissagaalu pillugit oqaaseqaqqammernera pillugu tusagassiortunik tallimanngornermi ualikkut katersortitsinerminni oqarpoq.
Nuummilu inuit Trumpimut ersarissumik itigartitsipput.
- Naa, susassaqanngilagut, Margrethe Thorleifsen KNR-imut oqarpoq.
- Una oqaatigineqartarpoq piitsut piitsunngoraluttuinnassapput pisuut pisuunngoraluttuinnassapput, susassaqanngilagut USA-mi.

Trump Juniorip Nuummut akunnerni tallimangajanni ”takornariatut” marlunngornermi tikeraarnerata kingorna inuit USA-mut atatillugu qanoq isumaqarnersut KNR-ip paasiniaaffigeqqippai.
Trump Junior angalaqatinilu Nuummi angalaarnerminni teqqiat MAGA-mik allassimasortallit inunnut aqqusinermi naapitaminnut Hotel Hans Egedemi ullup qeqqasiornissamut qaqqusaminnut agguaappaat namminnerlu inoqutinut attaveqaatiminnut atugassaminnik videolioqattaarlutillu assileeqattaarput.
Nunatsinni aqutsilerniarluni sakkutuulersornikkut pinngitsaaliisinnaasoq
Tamatuma nalaani præsidentinngortussaq Trump Floridami Mar-a-Lagomi tusagassiortunik katersortitsivoq. Tassanilu USA Danmarkilu naak Natomut ilaasortaagaluartut aamma naak USA Sorsunnersuup Aappaanili nunatsinni sakkutooqarfeqareeraluartoq aningaasaqarnikkut imaluunniit sakkutooqarnikkut pinngitsaaliilluni Kalaallit Nunaannik aqutsilerniarnissaq mattunnagu oqaatigaa.
Amerikamiut illersornissaqarfigisaat nunatsinniittoq ullumikkut ataasiinnaavoq, tassalu Pituffik Space Base. Sakkutooqarfik radareqarfeqarpoq, radari missiilinik takkuttoqaraluarpat USA-mut aarlerisaaruteqarsinnaavoq.

Trump Seniorip sakkutooqarnikkut pinngitsaaliilluni nunatsinni aqutsilerniarnissaminik mattussinnginnerarnera Jonna Brobergip ileqimisaassutigaa:
- Aappatigut soorunalimi taamaaliinnartoqarsinnaasutit ilimaginngilara. Danmarki avaqqunneqaannarsinnaannginnami Danmarkilu aamma suleqatigiillutik nunarpullu aamma Danmarkip ataaniikkallarluni massakkut. Taamaattumik ilimagivara arlaatungaatigut taanna ikkutinnginnermini isummernera immaqa misiliisoq isaasalerlugu.
Kalaallit Nunaata USA-p ilaaniilernissaa kissaatigaajuk?
- Uanga maani tamakkua eqqarsaatiginngilakka atalernissaat ilimaginngilara.
Arne Geisler isumaqataavoq:
- Qanoq oqassaanga, kalaallisut oqarluaannaraanni taamannak piumasaarsornera akuerineqarsinnaanngilaq. Kisianni aamma maluginiartussaassavarput uagut kalaaliuvugut oqartussaassuseqarluta.
Kalaallit Nunaata USA-p ilaaniilernissaa kissaatigaajuk?
- Naamersuaq naamiivik naamik. Pisariaqanngilaq nammineersinnaavugut uagut aamma.