Saattut eqqaanni toqungasup timaanik nassaaartoqarnera politiit suli misissuiffigaat
Saattut eqqaanni toqungasup timaanik nassaartoqarnera, Radioaviisimi sapaatip-akunnerata siuliani oqaluttuarigatsigu, Saattuni innuttaasut Saattunilu siornatigut najugaqarnikut politiinut saaffiginnissuteqarsimapput, saaffiginnissutillu tamakku politiinit misissorneqaleruttorput.
Pinerluttoqarsimanerannilli takussutissaqanngitsoq, politiit ilimagaat:
AAMMA ATUARUK Saattuni timi paniinnarnikoq pillugu attaviginnittut arlaqartut
- Toqusoqarsimanera pasinartutut nalilerparput. Sunami toqqutigineqarsimanersoq paasisimanngikkaangatsigut pasinartutut nalilertarparput. Matumanili pinerluttoqarsimasinnaaneranik takussutissaqanngilaq, Mads Odgaard oqarpoq.
Saattullu nalaani inummik maqaasisaqartoqanngitsoq, taassuma ilanngullugu erseqqissaatigaa:
- Aalisartoqarnerata nalaani inuit ilaatigut periarfeerunneqartarput. Toqungasulli timaanik nassaartoqarneranut atatillugu periarfeerunneqarsimasumut attuumassuteqarnersoq oqaatigisinnaanngilarput, Mads Odgaard oqarpoq.
AAMMA ATUARUK Uummannap eqqaani Saattut eqqaanni toqungasup timaa nassaarineqartoq
Nakorsaq toqusoqarsimatillugu misissuisartup pinerluttoqarsimaneranillu misissuisartup tikinnissaat politiit suli utaqqivaat. Taakku Saattunut sapaatip-akunnerata massuma ingerlanerani tikinnissaat naatsorsuutigineqarpoq, toqungasoq qanga toqusimanersoq, sunalu toqqutigisimaneraa paasineqarsinnaanersoq misissussallugu.