Saattuni timi paniinnarnikoq pillugu attaviginnittut arlaqartut
- Saaffiginnittut amerlanersaat oqaluttuarput, timi toqugasoq paniinnarnikorlu ukiorpassuarni ilisimaneqarsimasoq, Qaasuitsup Politiivini aqutsisoq, Mads Odgaard oqarpoq.
Inuit saaffiginnittut Uummannami politiinit oqaloqatiginissaat tullinnguuttoq, Mads Odgaard aamma oqarpoq.
Saattut eqqaani qaarusummi inuup timaa paniinnarnikoq innuttaasut ilaannit nassaarineqarsimasoq Radioaviisimi ippassaq oqaluttuaraarput.
- Timi paniinnarnikoorpasippoq taamaattumik qangarsuarli tassaniissimanissaa ilimanarluni, Mads Odgaard KNR-imut allakkamini ippassaq taama ilisimatitsivoq.
Toqusimasunik misissuisartoq aamma politiit pinerluttoqarsimatillu misissuisartua, Saattunut sapaatip akunnerata tulliata aallartinnerani tikittussaapput, misissussallugu timi paniinnarnikoq qanga toqusimanersoq.