VIDEO Saarullittassiisoqaqqinnissaa aalisartunit piumaneqarpoq
KNAPK-p immikkoortortaqarfii immikkut saarullittasseeqqittoqarnissaa pillugu naalakkersuisuugallartunut qinuuteqaateqaqqipput. Pisasseeqqittoqarneratali kingorna pisasseeqqittoqarnissaa Pinngortitaleriffimmiit mianersoqqutigineqarpoq. Pisasseeqqittoqassappat partiit siulittaasui immikkut aamma tusarniaaffigineqaqqaassapput, ullumikkullu tamanna naalakkersuisoqarfimmi aalajangiiffigineqassaaq.
Aamma atuaruk Saarullittassat ileqaqqinnissaannik politikerit piumasaqaqqittut
- Maannamut pisassiissutigineqareersut 12.000 tonsit qaangerujussuarlugit 16.500 tonsinik aalisartoqareerpoq, isumaqarpungalu pisasseeqqittoqassappat mianersortumik pisasseeqqittoqarsinnaasoq, taamaalilluta peqassutsimut qanoq kinguneqarsinnaanera malittarisinnaaniassagatsigut. Maannakkuugallartorli pisasseeqqittoqarnissaa inassutiginngilarput, Pinngortitaleriffimmi ilisimatooq, Rasmus Berg Hedeholm, oqarpoq.
Alisartuniilli qaatigineqarpoq sinerissap qanittuani saarulleqassusia maannakkut aarlerinanngitsoq.
-Soorunami Pinngortitaleriffik mianersoqqusissooq, aalisarsinnaasut tamaasa qalooqqunavianngilai. Uagut takusinnaavagut saarulliit takkussuuttut, taavalu takkusimaartut saarulleeqqaniit saarullerujussuarnut. Taamaammat ukiuni tulliuttuni aallarnissaasa tungaanut saarullissaqarpugut naammattunik, A.P.P. Qeqertarsuarmi siulittaasoq Kale Mølgaard oqarpoq.
Aamma atuaruk Atassut saarullittassiissutit amerlineqarnissaannik piumasaqartoq
Qinnuteqaatillu aallaavigalugit aalisarnermut naalakkersuisuugallartoq Finn Karlsen immikkut 2000 tonsinik pisasseeqqittoqarnissaanut naalakkersuisuugallartunut qinnuteqaateqarpoq.
Kalaallit Nunaatalu imartaani saarulliit amerliartorneri Pinngortitaleriffimmiit assortorneqanngilaq.
- Soorlu oqaatigineqareersoq saarulleqassuseq siuariartorpoq. Aamma uagut kisitsisaatitta tamanna uppernarsarpaa. Siuariartornerliuna iluatinnartuutikkipput taamaattumillu tamatumani mianersornissarput pisariaqarluinnarsoraarput Rasmus Berg Hedeholm, oqarpoq.
