Saarullittassat ileqaqqinnissaannik politikerit piumasaqaqqittut
![](/sites/default/files/styles/image_934x467/public/user_pictures/KristiansenJens-Otto_Kangersuaatsiaq__saarulliit.jpg?itok=u3Gcj5Og)
Saarulliit 1.500 tonsit Naalakkersuisuugallartunit, novembarip aallartilaarnerani pisassiissutigineqaqqipput partiinit tamanit isumaqataaffigineqartumik.
Pisassiissutigineqaqqittullu manna nungunneqareersullu, Lars-Emil Johansen, Anders Olsen Siumumiit aamma Partii Naleqqap siulittaasuanit, Hans Enoksenimit maanna piumasarineqarpoq, Naalakkersuisuugallartut pisasseeqqittariaqartut.
Hans Enoksenip taama piumasaqarnermini oqaatigaa, aalisarunnaarnermi aalisariutinik piginnittut taakkulu inuttaasa juulleriartornera aningaasatigut ajornartorsiorfigilertussaammassuk Naalakkersuisuugallartut pisasseeqqittariaqartut.
AAMMA ATUARUK Sinerissap qanittuani saarullinniarneq ullumi unissaaq
Siumut sinnerlugu Inatsisartunut ilaasortap, Anders Olsenip oqaatigaa, pisasseeqqittoqnngippat aalisakkerivinni sulisut aamma eqqugaassasut. Assersuutitut taallugu, Kujataani nunaqarfimmi Aappilattumi aalisakeriviup ammaqqinnerani iluatsittumik ingerlalernerigalua killuup tungaanut saatinneqariaannaanera, tassami nunaqarfimmi ilaqutariinnut taanna iluaqutaagaatsialersimagaluarmat.
Lars-Emil Johansenip Naalakkersuisuugallartut kajumissaarpai, saarullinniarneq ukiup sinneranut killilersugaanngitsumik ammaateqqullugu.
- Erseqqilluinnartunik ilisimasanik peqartoqanngippat, saarullinniarneq ukiup sinneranut ammaanneqartariaqarpoq, Lars-Emil Johansen kaammattuivoq.
AAMMA ATUARUK Sinerissap qanittuani saarullittassat 1.500 tonsinik ilaneqartut
Pinngortitaleriffimmi aalisakkanut qalerualinnullu tunngasunik ilisimasalik, Helle Siegstad radioaviisimut oqarpoq, saarulleqassutsimut ilisimasat naapertorlugit pisasseeqqittoqarsimasoq.
- Ukiuni kingullerni pingasuni saarulliit amerlisimaneri ilumoorpoq, pisasseeqqittoqarpalli saarulliit amerliartorneri innarlerneqariaannaavoq, Helle Siegstad Radioaviisimut oqarpoq.
Uumassusilerituut 2014-mut saarullittassat 12.000 tonsit innersuussutigaat, maannamulli tassa aalisarneqareerput 16.500 tonsit. Ukiullu sinneranut pisarisinnaasat killeqanngitsumik aammaanneqassagaluarpata 20.000 tonsit angullugit aalisarneqartussaassagaluartut, Helle Siegstadip radioaviisimut oqaatigaa, tassa pisassiissutit siulliit eqqarsaatigalugit taakku marloriaataat ukiup naaneraai pisarineqartussaassallutik.