Michael Rosing: Saarullittassiinermi siunissaq ungasinnerusoq eqqarsaatigineqanngilaq
![](/sites/default/files/styles/image_934x467/public/article_images/img_4581.jpg?itok=picgPft1)
Biologit innersuussutaanniit pingasoriaammik saarullittassiisoqarnera ingerlatsinerlunnerusoq, siunissarlu ungasinnerusoq eqqarsaatigineqanngitsoq Demokraatineersoq Michael Rosing isumaqarpoq.
- Ernumanartoqartippara, siunissarmi ungasinnerusoq eqqarsaatigineqanngilaq, sinerissap qanittuani saarullittassiissutit 36.500 tonsiussasut Naalakkersuisunit aalajangerneqarnerata kingorna Demokraatineersoq Michael Rosing oqarpoq.
24.000 tonsinik amerlanerusut
Taamaasillunilu biologit pisassiissutissatut innersuussutaannit 12.379 tonsinit, 24.000 tonsinik amerlanernik saarullittassiisoqarpoq.
Taama aalajangertoqarnera Michael Rosingip erseqqissumik isummerfigaa.
- Qinersisartut iluarisaannik aalajangiisoqarnera tassuuna takutinneqarpoq, sukkanerpaamik saarulittoqarnissaq anguniarneqarluni, siunissarlu ungasinnerusoq aamma kinguaariit tulliit eqqarsaatigineqarnatik. Tassami aamma siunissami aalisarsinnaanissarput kissaatigaarput, Michael Rosing oqarpoq.
AAMMA ATUARUK Aalisartut misilittagaat biologit innersuussutaannit pingaarnerupput
Ingerlatsinerlunnermik taagaa
Michael Rosing pisassiissutissiineq ingerlatsinerlunnermik taavaa, taassumami isumaa naapertorlugu innersuussutigineqartunit aalisarneruneq siunissami aalisarsinnaanissamut qulakkeerinnerunngimmat.
- Pisassiissutigineqartunit ikinnerusunik aalisarneq imminut akilersinnaaneruvoq, siunissarlu ungasinnerusoq eqqarsaatigalugu akisussaassuseqarnerulluni. Isumaqarpunga ajorluinnartumik ingerlatsisoqartoq, Michael Rosing oqarpoq.