Enoksen: Aalisartut misilittagaat biologit innersuussutaannit pingaarnerupput
Tamannalu tunngavigalugu biologit 12.000 tonsinik saarullittaasiinissamik innersuussutigisaat sinnerlugit pisassiinissaminut Hans Enoksen piareersimavoq. Pingasoriaammik amerlanerussagunartut Qanoruumut oqaatigaa.
- Aalisarneq toqqissisimasumik ingerlanneqassappat, taava aalisartut misilittagaat aallaavigineqartariaqassapput. Tassa Pinngortitaleriffik aallaavigissagaanni aalisarneq qaammatit pingasut iluanni taamaallaat ingerlanneqarsinnaassaaq, naalakkersuisoq oqarpoq.
2016-imut saarullittassiissutit tamakkiisut 34.400 tonsiupput, naak biologit 12.400 tonsit innersuussutigigaluaraat. Ukioq mannalu taamatut pisoqaqqinnissaa aamma ilimanarpoq.
- Uanga tassunga isumaqataannginnera ersarissumik oqaatigereersinnaavara, Hans Enoksen oqarpoq, 2017-imullu saarullitassiissutit qanittukkut saqqummiussinnaassallugit naatsorsuutiginerarlugu.
Inuit Ataqatigiinnersoq Ane Hansen isumaqarpoq pisassiissutit inaarutaasut aalajangersarneqalerpata aalisartut biologillu ataatsikkut tusaaniarneqartariaqartut.
Qanoruup ilanngutassiaa allaaserisap qulaatungaani isiginnaarneqarsinnaavoq.
