Ukrainep sakkutuui: Russit sakkutuuisa illoqarfitta ilaannik tiguaaniarnertik iluatsinngilaat
Ukrainep kangisissuani illoqarfiit, Bakhmut aamma Avdijivka, russinit tiguarniarneqaraluarneri iluatsinngitsut, ukrainimiut sakkutuuinit oqaatigineqarpoq.
Tiguaaniaaniarnerilli pilersaarutit malillugit ingerlasut, russit oqarput.
Illoqarfiit russinit tiguarniarneqartut marluk, nunap immikkoortuani Donetskimi illoqarfiit allat mikinerit ilanngullugit russinit 57-eriarluni saassunneqartarsimagaluartut, ukrainemiut sakkutuuinit oqaatigineqarpoq.
- Illoqarfik Bakhmut akeqqatsinnit saassunneqaqattaaraluartoq, sakkutuutsinnit sapeeqisunit illersorluarneqarpoq akeqqallu saassusseqattaaraluarneri ajutumeertittarlugit, ukrainemiut sakkutuuisa siuttui nalunaarput.
Tuluit illersornissaqarfiata paasisaat naapertorlugit illoqarfik Avdijivka russinit annikittuinnarmik saassunneqartarpoq, aamma paasisat naapertorlugit russit qamussui sorsuutit arlallit atorsinnaajunnaarsinneqarsimallutik.
Tuluilli paasisaat eqqunngitsuusut, russit Donetskimi guvernøriata Denis Pusjilinip oqaatigaa.
Donetskimi saassusseqattaarnerit pillugit illuatungeriit assortuuttumik oqaluttuneri, nutaarsiassaqartitsivimmit Reutersimit sorliit ilumoornersut suli paaseqarfigineqanngillat.
