Russeq sakkutooq Ukrainemi sorsunnermi pinerluuteqarsimasutut pisuunerartoq
Russit sakkutuuisa ilaat, Ukrainemi sorsunnerup nalaani sorsunnermi pinerluuteqarsimasutut pasineqarluni unnerluussutinut tamanut pisuunerarpoq.
Ukrainep illoqarfiisa pingaarnersaanni Kyivimi eqqartuussivimmi pingasunngornermi taamaaliorpoq.
Rusland Ukrainemik saassussimmalli sorsunnermi pinerluuteqarsimasutut pasineqartumik siullerpaamik eqqartuussivilersuussisoqarpoq.
AAMMA ATUARUK Assilisat qaammataasameersut Butjami sorsunnermi pinerluuteqartoqarsimaneranik unnerluussut taperserpaat
Sakkutooq Ruslandimeersoq 21-nik ukiulik, Vadima Sjisjimarin, Ukrainep avannamut kangisissortaani inummik sakkutuujunngitsumik 62-inik ukiulimmik februaarip ulluisa 28-anni aallaallugu toqutsisimasutut unnerluutigineqarpoq.
Vadima Sjisjimarin pisuutinneqassaguni inuunermi sinnerani parnaarussassanngortinneqaratarsinnaavoq.
Russit sakkutuui tallimat qamussui ingerlaartillutik saassunneqarmata biilinik aallarussiniartillutik sakkutuujunngitsumik toqutsisoqartoq, unnerluussisussaatitaasut oqaatigaat. Angut 62-inik ukiulik siumorpaat, toqutsisoqarsimaneranillu unnerluutiginninnginnissaa pillugu aallaallugu.