Assilisat qaammataasameersut Butjami sorsunnermi pinerluuteqartoqarsimaneranik unnerluussut taperserpaat

Assilisat qaammataasameersut aviisimi New York Times-imi saqqummiunneqartut Ukrainemi illoqarfimmi Butjami aqquserngup sinaani inuit sakkutuujunngitsut toqungasut takutippaat.

Russit sorsunnermi pinerluuteqarsimanerannut pasilliutit taamaalillutik sakkortusarneqarsinnaagunarput.

Ukrainemiut sakkutuuisa illoqarfik Butja russinit tallimanngormat tiguaqqippaat, inuillu toqungasut timaat aqqusinermiittut assit marsip qiteqqunnerata nalaani assilineqarsimasut takutippaat.   

Sorsunnermi pinerluuteqartoqarsimaneranik pasilliinerit Ruslandip ilumunnginnerarpai tassaanerarlugillu nutaarsiassat pisuussaartitat.  

Assilli qaammataasanit assilineqarsimasut allatut takutitaqarput. Inuimmi toqungasut timaat Ukrainemiut sakkutuuinit tassunga inissinneqarsimanngillat, russimmi illoqarfik tiguaqqammermassuk inuit toqungasut timaat aamma aqqusinermiipput. 

Sorsunnermi pinerluuteqarnerit imaluunniit taamaanngitsoq 

Russit sorsunnermi pinerluuteqarsimanersut sukumiisumik  misissueqqissaarfigineqaleruttorpoq.

- Qaammataasamit assilisat erseqqilluinnartuusut, Ukrainemi Butja qulaaniit assilisanik videonik assinillu inuit attaveqaqatigiiffianeersunik uppernarsaapput. Taakku takutippaat toqungasut timaat aqqusinerniittut, sapaatillu akunneri arlerlugit silamiiginnartut,  Maxar Technologies-it oqaaseqartartuat oqarpoq.

New York Times Butjap aqqusernatigut biilinik ingerlanermini filmiliorsimavoq, taamalu qaammataasamit assilisat sanilliunneqarsinnaalerlutik.

Tassani takutinneqartut assigiittut assigiinngitsunit isigalugit ilimanarluinnarpoq.

Inuit toqungasut timaat aqqusinermiittut assilineqarsimapput tallimanngormat biilit igalaaviniit saarlerniit assilineqarsimasut.

Toqungasullu taakku aamma marsimi siusinnerusukkut qaammataasakkut takuneqarsinnaapput tassanerpiarmiittut.