Russit saassussinerata issittumi suleqatigiinneq unitsikkallaraa

Issittumi Siunnersuisoqatigiinni ataatsimiinnerit unitsinneqarallarput.

Tamanna Ruslandip Ukrainemut saassussinerata kingorna pivoq. Nunanut allanut ministereqarfik taama paasissutissiivoq.

Rusland Issittumi Siunnersuisoqatigiinni siulittaasuuvoq. Tassanilu nunat ilaasortat – matumani Danmark ilanngullugu – issittumut tunngasut oqallisigisarpaat.

Oqaluuserisat avatangiisinik illersuinermut, silap pissusianut, peqqinnissamut, imaanut tunngasunik suleqatigiinnermut attanneqarsinnaasumillu aningaasatigut ineriartornermut tunngasinnaapput.

- Putinip Ukrainemut pissutissaqanngitsumik sorsunnermik saassussinera Issittumi Siunnersuisoqatigiinnut, Ruslandip siulittaasuuffigisaanut aamma kinguneqarpoq, nunanut allanut tunngasunut ministeri, Jeppe Kofod (S) allakkatigut oqaaseqarnermi oqarpoq.

AAMMA ATUARUK Ilisimatooq: Issittumi suleqatigiinnerup sorsunnermit eqqugaanissaa ilimanarluinnartoq

Ruslandip Ukrainemut saassussinera sapaatip akunnerata siuliani sisamanngornerup unnuaani aallartippoq.

- Kalaallit Nunaat, Savalimmiut, Danmark nunallu allat arfinillit Issittumi Siunnersuisoqatigiinni ilaasortaasut – soorunami Rusland peqatiginagu – siunnersuisoqatigiinni sulinermik unitsitsigallarnissartik aamma ilaatigut piffissami aggertumi ataatsimiinnginnissartik isumaqatigiissutigaat, Kofod oqarpoq.

- Siunnersuisoqatigiit piuinnarnissaanut piffissarlu ungasinnerusoq eqqarsaatigalugu ingerlanissaanik qulakkeeriniarnissaq aamma Ruslandip akuersaarneqarsinnaanngitsumik iliuuseqarnera aqqutini tamani kingunerluuteqartoq Ruslandimut erseqqissumik nalunaarutigissaa pingaaruteqarsimavoq, Kofod oqarpoq.